10 óńir ónerkásiptik shyǵaryndylardy avtomatty baqylaý júıesin ornatýǵa qarjy tappaı otyr
ASTANA. KAZINFORM – Ekologııa jáne tabıǵı resýrstar mınıstri Erlan Nysanbaev Májiliste ótip jatqan qorshaǵan ortany qorǵaý týraly dóńgelek ústelde ónerkásiptik shyǵaryndylardy avtomatty baqylaý júıesin ornata almaı otyrǵan óńirler bar ekenin aıtty.
«Sonymen birge 1-sanattaǵy iri kásiporyndardyń ónerkásiptik shyǵaryndylaryn baqylaý maqsatynda avtomattandyrylǵan monıtorıng júıesin ornatý boıynsha jumystar júrgizilip jatyr. Júıeni 2024 jyldyń sońyna deıin ornatýǵa mindetti 91 kásiporyn belgilendi. Búgingi tańda 65 kásiporyn monıtorıngtiń avtomattandyrylǵan júıesin ornatty», - dedi ol.
Erlan Nysanbaev jyl aıaǵyna deıin 9 kásiporyn monıtorıngtiń avtomattandyrylǵan júıesin ornatýdy josparlap otyrǵanyn atap ótti.
«Qarajattyń bolmaýyna baılanysty 10 óńirde 17 kásiporyn monıtorıngtiń avtomattandyrylǵan júıesin ornatpaǵan. Onyń ishinde jergilikti atqarýshy organdarǵa tıesili 12 kommýnaldyq jáne 5 energetıkalyq kásiporyn. Jumysty kúsheıtý maqsatynda Kásipkerlik kodeksine qorshaǵan ortaǵa emıssııalardy monıtorıngtiń avtomattandyrylǵan júıesi derekteri negizinde jospardan tys tekserýler júrgizý úshin ózgerister engizý usynylady. Osy usynysty qoldaýlaryńyzdy suraımyz», - dedi mınıstr.
Eske sala keteıik, buǵan deıin Ekologııa jáne tabıǵı resýrstar mınıstri qorshaǵan ortany qorǵaý josparyn oryndamaǵan ákimderdi zańmen jazalaýdy usynǵan bolatyn.
