10 óńir ákimdigi azamattyq qyzmetshilerdiń jalaqysyn arttyrý quqyǵyn paıdalanbaı otyr
ASTANA. KAZINFORM — Óńirlik ákimdikter azamattyq qyzmetshilerdiń jalaqysyn arttyrýǵa quqyly. Bul týraly Májilis depýtattarynyń saýalyna Premer-mınıstrdiń orynbasary Ermek Kósherbaevtyń jaýabynda aıtylǵan.
— Úkimet memlekettik mekeme men qazynalyq kásiporyndardyń tehnıkalyq jumyskerleriniń jalaqysy deńgeıin arttyrý boıynsha naqty sharalar qabyldanyp jatyr. Memleket basshysynyń tapsyrmasyna sáıkes 2022-2025 jyldary azamattyq qyzmetshilerdiń jekelegen sanattarynyń (onyń ishinde tehnıkalyq jumyskerlerdiń — tazalaýshy, júrgizýshi, elektrık, tazalaýshy, kúzetshi, vahter) eńbekaqysy jyl saıyn orta eseppen 20 paıyzǵa ulǵaıtylyp keldi. Nátıjesinde 2025 jylǵa qaraı olardyń jalaqysy 2 ese ósti, — dedi vıtse-premer.
Onyń atap ótýinshe, azamattyq qyzmetshilerge eńbekaqy tóleý júıesi memlekettik mekemeler men qazynalyq kásiporyndar úshin biryńǵaı. Tehnıkalyq jumyskerler ekonomıkanyń barlyq salasynda jumys isteıdi jáne olardyń qyzmeti barlyq sala úshin ortaq.
— Osyǵan baılanysty, jumyskerler jalaqysyn kóterýdi barlyq sala úshin keshendi túrde qarastyrǵan jón. Sebebi, bir saladaǵy jumyskerdiń bir sanatynyń jalaqysyn kóterý basqa saladaǵy jumyskerdiń narazylyǵyn týdyryp, olardyń tarapynan osyndaı talapqa ákeledi, — dedi vıtse-premer.
Ermek Kósherbaev «Azamattyq qyzmetshilerge, memlekettik bıýdjet qarajaty esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesi týraly» Úkimet qaýlysy aıasynda 2022 jyldan bastap, jergilikti atqarýshy organdarǵa (tıisti jergilikti ókildi organnyń sheshimimen) jergilikti bıýdjetten qarjylandyrylatyn uıymdar jumyskerleriniń laýazymdyq aılyq aqysyna yntalandyrýshy ústemeaqylar belgileý quqyǵy berilgenin aıtady.
— Onyń tártibi men sharttaryn tıisti jergilikti atqarýshy organ aıqyndaıdy. Búginde atalǵan normanyń negizinde óńirlik ákimdikter azamattyq qyzmetshilerdiń jalaqysyn arttyrýǵa quqyly. 2024 jyly ústemaqylardy 10 ákimdik (Astana q., Almaty q., Shymkent q., Jambyl, Qaraǵandy, Túrkistan, Jetisý, Almaty, Soltústik Qazaqstan, Qostanaı oblystary) belgiledi. Osyǵan baılanysty, qalǵan oblystar osy normany negizge ala otyryp, jergilikti bıýdjetten ústemaqyny tóleýge tolyqtaı quqyǵy bar, — dedi Úkimet basshysynyń orynbasary.
Aıta ketelik sý salasy qyzmetkerleriniń jalaqysy 50%-ǵa deıin ósetini týraly jazǵan edik.