10 myńnan astam talapkerge magıstratýra granty taǵaıyndaldy

NUR-SULTAN. QazAqparat – 2020-2021 oqý jylyna arnalǵan magıstratýra dárejesi boıynsha granttar 10 202 adamǵa taǵaıyndaldy. Bul týraly QR BǴM Joǵary jáne joǵary oqý ornynan keıingi bilim berý departamentiniń dırektory Ádilet Toıbaev aıtty, dep habarlaıdy QazAqparat tilshisi.

«Búgin 2020-2021 oqý jylyna arnalǵan magıstratýra dárejesi boıynsha granttardy taǵaıyndaý konkýrstyq komıssııanyń sońǵy otyrysy ótti. Beıindi baǵyttarda magıstratýra boıynsha grant ıegerleri anyqtaldy. Osymen konkýrstyq komıssııanyń resmı jumysy aıaqtaldy. 2020-2021 oqý jylyna magıstratýrgaǵa 12 829 grant bólindi. Ǵylymı-pedagogıkalyq baǵyt boıynsha 12 119, beıindik magıstratýrǵa 710 grant bólinip otyr», - dedi ol.

Onyń atap ótýinshe, keshendi testileý 17 tamyz ben 1 qyrkúıek aralyǵynda ótti. Keshendi testileý alǵash ret kompıýterlik formatta elektrondy túrde ótkizildi.

«Keshendi testileý aıasynda alynǵan balldar negizinde konkýrs boldy. Testileýge 38 199 adam ótinish berdi. Olardyń ishinde 34 746 talapker qatysty. Osy talapkerdiń arasynda 13 051 úmitker memlekettik bilim berý grantyn taǵaıyndaý konkýrsyna qatysý múmkindigine ıe boldy. Demek, 13 myńnan astam talapker keshendi testileýden 75-ten joǵary ball jınaǵan. 5 qyrkúıekke deıin konkýrsqa qabyldaý júrgizdik. Granttardy taǵaıyndaý konkýrsyna 12 179 adam qatysty. Konkýrs 2 kún júrgizildi. Nátıjesinde komıssııa sheshimimen 10 202 adam grant ıgeri atandy. Onyń 128 úmitker beıindik magıstratýra negizinde grant aldy», - dedi Ádilet Toıbaev.