10 myńnan astam otandasymyz Qytaıda júr - Eljan Birtanov
«Qazir Qytaıda júrgen azamattarymyz kóp-aq. Qazaqstan Respýblıkasy Syrtqy ister mınıstrliginiń málimetinshe, 10 myńnan astam otandasymyz Qytaıda júr. Qazaqstan azamattary, árıne, elge oralýy kerek. Biz áýe saparlaryn shektemeımiz, olar qaıtyp kelip jatyr. Sonymen qatar, qajet bolǵan jaǵdaıda Qytaıdyń basqa aımaqtarynan azamattardy evakýatsııalaý úshin Úkimet qazirgi ýaqytta charterlik reısterdi qoldana otyryp, olardy elge ákelýdi qarastyrýda. Qazaqstan azamattarynyń QHR-dyń basqa qalalarynan oralýyna eshqandaı shekteý joq», - dedi Densaýlyq saqtaý mınıstri Eljan Birtanov OKQ-da ótken baspasóz máslıhatynda.
Mınıstrdiń aıtýynsha, qazaqstandyqtar reıstik ushaqtarmen de, charterlik reıstermen de elge orala alady.
«Úkimet QR Syrtqy ister mınıstrligimen birge barlyq máseleni baqylaýda ustap otyr. Barlyq azamattarmen baılanysymyz bar. Olardyń jaǵdaıyn da qadaǵalap otyrmyz. Búgingi tańda Qazaqstan azamattary arasynda mundaı jaǵdaılar tirkelgen joq. Olardyń ótinishi boıynsha elge qaıtaramyz. Al shyntýaıtynda olardyń bári birdeı elge qaıtqysy kelip otyrǵan joq. Bul jumys josparly túrde júrip jatyr», - dep túsindirdi Densaýlyq saqtaý mınıstri.