10 myńnan astam kolledj stýdenti kásiporyndar tapsyrysymen oqyp jatyr
«Bıylǵy oqý jylynan bastap kolledjderge kásiporyn ótinimderi boıynsha kadr daıarlaý engizildi. Ózara yntymaqtastyq eńbek naryǵynyń suranysyna saı maman ázirleýge múmkindik beredi. Memlekettik tapsyrystyń artyqshylyǵy – kolledj bitirgen soń stýdent tapsyrys berýshiniń kompanııasynda jumys isteıdi. Ol úshin bilim berý uıymy, kásiporyn jáne stýdent arasynda úsh jaqty kelisimshart jasalady», - delingen vedomstvo aqparatynda.
Oqý-aǵartý mınıstrligi Tehnıkalyq jáne kásiptik bilim departamentiniń dırektory Ernat Júnisovtiń aıtýynsha, mınıstrlik Memleket basshysynyń tapsyrmasyna saı bıylǵy oqý jylynan bastap jumys berýshilerdiń ótinimderi boıynsha oqytýdy bastady. Kolledjder eńbek naryǵyna qajet kadr daıyndaıdy. Óz kezeginde kásiporyndar stýdentterdi óz bazasynda tájirıbeden ótkizedi, taǵylymdama uıymdastyrady, keıin jumysqa qabyldaıdy.
«Maqsatty tapsyrys kolledjderge kadr suranysyna saı bilim berý baǵdarlamalaryn jańartýǵa múmkindik beredi. Búgingi tańda kadr daıarlaýdy «Saryarqa avtoprom», «Kamaz» JShS, «Arselor Mıttal Temirtaý» AQ, «Kentaý transformator zaýyty» AQ, «Bazıs-Astana», «Aster Auto Astana» JShS jáne basqa da iri kásiporyndar qoldap otyr. Maqsatty tapsyrys boıynsha 10 myńnan astam stýdent oqıtyn bolady», - delingen mınıstrlik habarlamasynda.
