10 myńnan astam qazaqstandyqqa reprodýktıvti densaýlyq boıynsha aqparat berildi
ASTANA. 2 jeltoqsan. QazAqparat /Marlan Jıembaı/ - Jeltoqsanda Qazaqstan jynystyq jáne reprodýktıvti densaýlyq qaýymdastyǵy «Salamatty Qazaqstan» memlekettik baǵdarlamasy aıasynda júzege asyryp jatqan «Deni saý otbasy» jobasy aıaqtalady.
Bul týraly búgin elordada ótken dóńgelek ústel barysynda atalǵan qaýymdastyqtyń atqarý dırektory Galına Grebenşıkova málim etti.
Onyń atap ótýinshe, jobany júzege asyrý barysynda 10 myńnan astam jasóspirimder men eresek adamdar reprodýktıvti densaýlyq, otbasyn josparlaý jáne jynystyq jolmen juǵatyn ınfektsııalyq aýrý túrleri boıynsha keń maǵlumat aldy.
«Biz osy máselede halyqtyń qanshalyqty aqparatqa ıe ekendigin bilý jáne reprodýktıvti densaýlyq boıynsha qyzmet túrlerine qol jetimdilik qandaı deńgeıde ekenin saralaý maqsatynda saýalnama júrgizdik. Respondentterdiń bir bóliginiń otbasyn josparlaý týraly túsinikteri durys emestigine kóz jetkizdik», - dedi ol.
Onyń aıtýynsha, «Deni saý otbasy» jobasyn júzege asyrý úshin elimizdiń densaýlyq saqtaý mınıstrligi tarapynan 8,5 mln. teńge qarjy bólingen.
