10 myńnan astam el azamattary áleýmettik jáne eńbek máseleleri boıynsha málimet aldy - QR DSÁDM

ASTANA. QazAqparat - QR DSÁDM jergilikti atqarýshy organdarmen birlese uıymdastyrǵan aqparattyq-túsindirý jumystary aıasynda elimizdiń 10261 azamattary áleýmettik qorǵaý jáne jumyspen qamtý salasyndaǵy zańnamalardyń negizgi ózgeristeri týraly keńester aldy.

Bul týraly Qazaqstan Respýblıkasy densaýlyq saqtaý jáne áleýmettik damý mınıstrliginen habarlady.

QR DSÁDM Eńbek, áleýmettik qorǵaý jáne kóshi-qon komıtetiniń aýmaqtyq departamentteriniń, óńirlerdegi jumyspen qamtý jáne áleýmettik baǵdarlamalar basqarmalary men jumyspen qamtý ortalyqtarynyń qyzmetkerleri aǵymdaǵy jylǵy naýryz aıynan bastap eldi mekenderdiń 2659 turǵyndarymen jáne 987 kásiporyndar men uıymdardyń  qyzmetkerlerimen  kezdesýler ótkizdi.

10261 aqparattyq-túsindirý jumystarymen qamtylǵan azamattardyń ishinde  6850-i jumyspen qamtý jáne «Órleý» jobasynyń júzege asyrylýy týraly, 811-i zeınetaqymen qamsyzdandyrý týraly, 666-si múgedekterdi áleýmettik qorǵaý jáne 912-si basqa da áleýmettik-eńbek salasy boıynsha keńester aldy.

26-27 mamyrda QR Densaýlyq saqtaý jáne áleýmettik damý mınıstrliginde QR DSÁDM aımaqtyq komıtetteriniń, óńirlerdegi jumyspen qamtýdy úılestirý jáne áleýmettik baǵdarlamalar basqarmalarynyń jáne vedomstvoǵa baǵynysty uıymdardyń ókilderi úshin densaýlyq saqtaý jáne áleýmettik-eńbek salalaryndaǵy memlekettik saıasattyń negizgi baǵyttary boıynsha oqytý semınarlary ótkenin esterińizge sala keteıik.

Semınar qatysýshylaryna halyq arasynda áleýmettik kómek, áleýmettik qamsyzdandyrý, jumyspen qamtý jáne densaýlyq saqtaý salalaryndaǵy zańnamalardaǵy negizgi ózgerister týraly aqparattyq-túsindirý jumystaryn ótkizý boıynsha usynymdar berildi.