10 myńǵa jýyq jambyldyq KVI-ge qarsy vaktsınanyń ekinshi komponentin qabyldady
TARAZ. QazAqparat – COVID-19 juqtyrǵandar sanynyń artýyna baılanysty Jambyl oblysynyń ákimi Berdibek Saparbaevtyń tóraǵalyǵymen koronavırýstyq ınfektsııanyń taralýyna qarsy kúres jónindegi shtabtyń kezekti otyrysy ótti, dep habarlaıdy QazAqparat tilshisi.
Ótken táýlikte taldama qorytyndysy 57 adamda oń nátıje kórsetip, ósim 0,7 paıyzdy qurady. Eń kóp jaǵdaı anyqtalǵandar – ádettegideı Taraz qalasy, Qordaı jáne Baızaq aýdandary. Oblys ortalyǵy «qyzyl» aımaqta desek, shahardaǵy aptalyq ósim 304 naýqasqa jetip, 8,7 paıyzdy quraǵan. Qordaıda bul kórsetkish – 6,2 paıyzǵa aınalyp otyr. Al, respýblıkalyq kórsetkish 5,6 paıyzdan aspaıdy.
Densaýlyq saqtaý basqarmasynyń basshysy Áset Qalıevtiń aıtýynsha, 27 sáýirdegi jaǵdaı boıynsha ınfektsııalyq statsıonarda 897 adam em alýda (tósek-oryndardyń tolý júktemesi – 36%), onyń 54-i jan saqtaý bóliminde. Medıtsınalyq mekemelerdiń materıaldyq-tehnıkalyq jabdyqtalýy men dári-dármektermen qamtylýy boıynsha eshqandaı másele joq.
Oblysta 37 egý pýnkti jumys isteýde. 36,7 myń jambyldyq vaktsınanyń birinshi komponentin, 9,9 myń jambyldyq ekinshi komponentin qabyldaǵan. Moıynqum, Shý, Merki aýdandarynda jáne Taraz qalalyq №9 emhanada vaktsınatsııa álsiz qarqynmen júrýde. Sáýir aıynyń sońyna deıin taǵy 49,9 myń adamǵa ekpe egilýi kerek.
Sanıtarlyq-epıdemıologııalyq baqylaý departamentiniń basshysy Baıdildá Shynalıev qazirgi tańda qosymsha shekteýler engizý týraly qujat ázirlenip jatqanyn jetkizdi. Onyń aıtýynsha, jańa sharalar bazarlardyń, oblysaralyq avtobýs qatynasy men basqa da segmentterdiń qyzmetine áser etedi.
Óz kezeginde oblys ákiminiń orynbasary Almas Mádıev Ashyq jobasynyń álsiz iske asyrylyp jatqanyna nazar aýdartty. Ol boıynsha Tarazdaǵy tek 39 kásiporyn ǵana jumys isteýde, al aýdandarda bul tájirıbe múldem taratylmaǵan.
«Tótenshe jaǵdaılar departamenti monıtorıngtik toptardyń jumysyna eshqandaı kómek kórsetip otyrǵan joq. Olarmen turaqty baılanysta bolý úshin TJD bastyǵy shuǵyl máselelerdi sheshý boıynsha óz orynbasaryn bekitýi qajet. Turǵyndar arasynda sanıtarlyq normalardy qatań saqtaý qajettiligi týraly túsindirý jumystarynyń aýqymyn keńeıtý asa mańyzdy. Qoǵamdyq kólik pen bazarlarǵa aıryqsha nazar aýdarý kerek. Mektep oqýshylary men muǵalimder arasyndaǵy ınfektsııanyń taralýyna baqylaýdy nazarǵa alyńyzdar», - dedi Berdibek Saparbaev.
