10 myńǵa jýyq aýyl turǵyny «Jumyspen qamtý jol kartasy - 2020» baǵdarlamasyna qatysýǵa nıet bildirdi

ASTANA. QazAqparat - QR DSÁDM jumyldyrý toptarynyń «Jumyspen qamtý jol kartasy - 2020» baǵdarlamasy jóninde aǵymdaǵy jylǵy 16 naýryz jáne 6 sáýir aralyǵynda júrgizgen túsindirý jumysynyń nátıjesinde, jumyssyzdar, ózin ónimsiz jumyspen qamtyǵan, aýyldyq jerlerde turatyn áleýmettik az qamtylǵan tulǵalardyń qatarynan 9 myń 957 qazaqstandyq azamat osy baǵdarlamaǵa qatysýǵa nıet bildirdi, dep habarlaıdy vedomstvonyń baspasóz qyzmeti.

Jumyldyrý toptarynyń kómegimen taǵy 1560 azamat «JQJK-2020» baǵdarlamasy sheńberinde bos jumys oryndaryna ornalasty.

«JQJK-2020» baǵdarlamasyna qatysýǵa nıet bildirgenderiń basym kópshiligi Ońtústik Qazaqstan oblysynan - 6 myń 409 adam, Almaty oblysynan - 1 myńǵa jýyq adam jáne Astana qalasynan - 377 azamat.

Búgingi kúni jumyldyrý toptarymen respýblıkanyń 124 aýdanynyń 252 aýyldyq okrýgi, josparlanǵan sannyń 60%-dan astamy qamtyldy.

Buryn habarlanǵandaı, jalpy Qazaqstan boıynsha quramynda 441 qyzmetkeri bar 178 jumyldyrý toby qurylǵan. Jumyssyzdyq deńgeıi joǵary, ózin ónimsiz jumyspen qamtyǵan, áleýmettik az qamtylǵan tulǵalary kópten sanalatyn, sondaı-aq halyqtyń «JQJK-2020» baǵdarlamasyna qatysý deńgeıi tómen 181 aýdannyń 404 aýylynyń turǵyndaryn qamtý josparlanýda. Jumyldyrý toptarynyń jumysy aǵymdaǵy jylǵy 15 sáýirge deıin jalǵasady.