10 myńǵa jýyq adamǵa qyzmet kórsetken meıirger: Ár naýqasqa janashyrlyqpen qaraımyn
QYZYLORDA. QazAqparat - Qyzylorda qalasynda turatyn meıirger Gúlsim Dosaeva medıtsına salasynda otyz jyldan astam ýaqyttan beri qyzmet atqaryp keledi. Ol ózine qarasty aýmaqtaǵy turǵyndardyń árbiriniń meken-jaıyn jaqta biledi, dep habarlaıdy QazAqparat tilshisi.
Búginde №3 qalalyq emhananyń meıirger qyzmetin atqaratyn Gúlsim Dosaeva Qarmaqshy aýdanynyń Aqjar aýylynda 1966 jyly dúnıege kelgen. Bala kezinen dáriger bolýdy armandaǵan ol 1983 jyly Qyzylorda medıtsınalyq kolledjine oqýǵa túsip, ony feldsher mamandyǵy boıynsha oıdaǵydaı aıaqtady.
Alǵash eńbek jolyn medıtsınalyq bekette meıirbıke bolyp bastaǵan Gúlsim 1991 jyldan bastap №1 qalalyq emhanada qyzmetin jalǵastyrdy. Atalǵan emhanada 20 jyldan astam ýaqyt boıy halyqqa qyzmet kórsetip, kóptiń alǵysyna bólenedi.
«Medıtsına salasy qashanda úlken jaýapkershilikti talap etetini belgili. Biz muny eshqashan esten shyǵarǵan emespiz. Aldymyzǵa kelgen árbir naýqastyń dertinen jazylyp shyǵýyna qol ushyn sozamyz. Osylaısha eldiń alǵysyna bólenip jatatyn kezimiz az emes», - dedi meıirbıke Gúlsim.
Meıirger 10 myńǵa tarta turǵynǵa qyzmet kórsetken ol óz isiniń naǵyz maıtalman mamany. Turǵyndardy týysyndaı jaqyn tutyp, árbiriniń jeke basyn anyqtaıtyn málimetterin jınaqtaıdy. Olardyń árbiriniń meken-jaıyn jatqa biletin meıirbıke jumysyna degen jaýapkershilikti bárinen bıik qoıady.
Tájirıbeli maman 2012 jyly №3 qalalyq emhanaǵa nefrolog meıirbıkesi bolyp jumysqa aýysty. Munda da ol turǵyndardan tek rızashylyq alyp keledi. Onyń naýqastardy emdeýde, aýrýynan aıyqtyrý jolyndaǵy eńbegi aıtarlyqtaı zor.
«Naýqastarǵa kómektesýdi árdaıym aldyńǵy kezekke qoıamyn. Olardyń sapaly em alýyn tikeleı qadaǵalaımyn. Osylaısha árbir adamnyń saýyǵyp ketýine janashyrlyqpen qaraımyn», - deıdi ol.
