10 myń oqýshy «Astana Opera» teatrynyń ásemdigin tamashalaýǵa múmkindik aldy
ASTANA. 16 qańtar. QazAqparat - «Astana Opera» teatrynyń úsh aıda atqarǵan jumysy óz nátıjesin berdi. Búginde jańa óner shańyraǵynda 10 myń astanalyq oqýshy bolyp qaıtty, dep habarlady óner ordasynyń baspasóz qyzmetinen.
«Oqýshylardy óner ordasyna ekskýrsııaǵa alyp kelý máselesi Astana qalasynyń bilim basqarmasymen birigip sheshilgen bolatyn. Mektepten keletinderdiń kestesi qurylyp, soǵan sáıkes kúnine teatrǵa 3-4 oqýshylar toby kelip qaıtty. Búginde «Astana Operada» elorda oqýshylarynyń 60 paıyzy boldy, olardyń ishinde № 2, 4, 5, 14, 19, 16, 20, 23, 59, 66, 70, 71 syndy mektepter men № 1 lıtseı bar», - delingen habarlamada.
«Teatr Elbasy N.Nazarbaevtyń bastamasymen tek ádemi qoıylymdar júrgizý úshin ǵana emes, sonymen qatar árbir adam osy tamasha ǵımaratqa kelip, sáýlet óneriniń keremet qoltańbasyna súısinip, sahna syrtyna úńilip, ınjenerler ebin biletin tań qaldyrarlyq sahnanyń kúrdeli qurylymy men tehnıkanyń zamanaýı sheshimderin kórýge salynǵan. Ásem teatrǵa kelgen balalardyń talǵamy da jaqsy bolyp qalyptasady», - dedi «Astana Opera» teatrynyń dırektory Tólegen Muhamedjanov.
«Astana Opera» teatry murajaıynyń meńgerýshisi Qusaıynova Aprıza balalar men olardyń ata-analary, ustazdar teatrdyń ásemdigin tamashalaýǵa qýana kelgenderin aıtady. «Bizge tek astanalyq oqýshylar ǵana emes, Shymkent qalasynyń jáne Qosshy aýylynyń da balalary keldi. Áserlerimen bóliskender bul jerde birinshi kezekte adam jany demalatynyn aıtady. Teatrǵa degen qyzyǵýshylyq kún sanap artyp keledi», - deıdi ol.
Endi teatr Qazaqstan Respýblıkasynyń barlyq oblys ortalyǵyndaǵy balalarǵa óz esigin ashýǵa daıyn.
Teatr murajaıy qazaqstandyqtardy mamyr aıynda tań qaldyratyn jańa kórme daıyndap jatqanyn aıta ketken jón. Ekspozıtsııada búkil ǵumyryn Qazaqstan óneriniń tórine arnaǵan ataqty opera jáne balet ártisteri, kompozıtorlar men sýretshilerdiń kostıýmderi qoıylady.
Ekskýrsııa kúnine eki ret 11:00 jáne 15:00-de qazaqsha, oryssha jáne aǵylshynsha júredi.
