10 myń halqy bar eldi mekenderde qoqys polıgondary salynady
Úkimet basshysy «Jasyl Qazaqstan» ulttyq jobasynyń negizgi maqsaty – atmosferalyq aýanyń lastanýyn azaıtý, qaldyqtardy, sý resýrstary men orman sharýashylyǵyn basqarý júıesin jetildirý ekenin eske saldy.
«Qorshaǵan ortany jaqsartý úshin kelesi jyly 1 qańtardan bastap iri kásiporyndarda emıssııalar monıtorınginiń avtomatty júıesin engizý qajettigi týraly norma kúshine enedi. Atalǵan shara árbir kásiporynnyń zııandy qaldyqtary týraly jedel ári shynaıy aqparat alýǵa baǵyttalǵan. Sondaı-aq, bul norma kásiporyndarǵa monıtorıng júrgizip, atmosferaǵa shyǵatyn zııandy qaldyqtar deńgeıi asyp ketken jaǵdaıda jedel sharalar qoldanýǵa múmkindik beredi», - dedi Á. Smaıylov búgingi Úkimet otyrysynda.
Sonymen birge Prezıdent tapsyrmasymen 5 jylda 2 mlrd túp aǵash otyrǵyzý jobasy iske asyrylyp jatyr. 2021 jyly 66 myń gektar alańǵa 138 mln aǵash otyrǵyzyldy.
Alaıda, bıyl keıbir óńirlerde jergilikti deńgeıde qarjylandyrý az bolǵandyqtan, josparly kórsetkish oryndalmaı qalýy múmkin.
«Ótken jyldan beri ekologııalyq tólemder ekologııalyq ahýaldy jaqsartý sharalaryna baǵyttalýy tıis degen norma qoldanylyp keledi. Ol úshin Ekologııa mınıstrligi ákimdiktermen birge árbir óńir boıynsha ekologııalyq jaǵdaıdy jaqsartý úshin is-sharalar josparyn ázirleýi kerek. Buǵan qosa, osy jyly Indýstrııa mınıstrligi turǵyndarynyń sany 10 myńǵa deıingi eldimekenderde turmystyq qatty qaldyqtar polıgondarynyń jobalaý-smetalyq qujattamasyn ázirleýdi bastady», - dedi Á. Smaıylov.
Sonymen birge Premer-Mınıstr Aqtóbe men Batys Qazaqstan oblystarynyń ákimdikteri Qarjy mınıstrligimen birlesip, bıylǵy jyly aǵash egýdiń josparlanǵan kólemin qarjylandyrý máselesin pysyqtaýdy tapsyrdy.
Indýstrııa, Qarjy jáne Ekologııa mınıstrlikteri iri eldi mekenderde turmystyq qatty qaldyqtar polıgondaryn salý úshin jobalaý-smetalyq qujattamany ázirleýge qarajat bólýdi qarastyrýy qajet.
