10 mınýtta psıhologııalyq portret: Ulttyq ulan jańa E-Nazar júıesin engizdi
ASTANA. KAZINFORM — Qazaqstan Respýblıkasy ІІM Ulttyq ulanynda E-Nazar áskerı qyzmetshilerin psıhologııalyq súıemeldeýdiń tsıfrlyq júıesi engizildi. Bul týraly qýatty qurylymnyń baspasóz qyzmeti málim etti.
— Júıeni engizýdiń arqasynda nátıjelerdi óńdeý ýaqyty eki saǵattan 10-15 mınýtqa deıin qysqardy, qaǵaz qujattamasynyń kólemi 80%-ǵa azaıdy, al psıhologııalyq qyzmet mamandarynyń jumys ýaqytyn jalpy únemdeý shamamen 2000 saǵatty qurap otyr, — delingen habarlamada.
Júıe psıhologııalyq testileýden ótkizýdi, nátıjelerdi avtomatty túrde óńdeýdi jáne analıtıkalyq derekterdi qalyptastyrýdy biryńǵaı ortalyqtandyrylǵan protseske biriktiredi.
— Platformada merzimdi qyzmettegi áskerı qyzmetshilerdiń, kelisimshart boıynsha áskerı qyzmetshilerdiń jáne ofıtserlerdiń psıhologııalyq testileýden ótý múmkindigi qarastyrylǵan. E-Nazar-dyń basty artyqshylyqtarynyń biri — derbes derekterdi qorǵaýdyń joǵary deńgeıi, aqparatty óńdeýdiń joǵary jyldamdyǵy, qaǵaz qujattamasynyń kólemin azaıtý jáne psıhologııalyq qyzmet mamandaryna júktemeni aıtarlyqtaı azaıtý, — dep habarlady Ultttyq ulannan.
Psıhologııalyq ádisterdiń elektrondyq nusqalaryn ulandyq qos sarbaz — efreıtor Kım Hen Ý men qatardaǵy Berikjan Bektursynov aǵa ofıtserlerdiń basshylyǵymen ázirlegeni jobaǵa erekshe mán beredi. Olar jasaǵan aqparattyq ónim patenttelgen, bul onyń jańalyǵy men praktıkalyq mańyzdylyǵyn rastaıdy.
Tsıfrlyq júıeniń tıimdiligi elordalyq 5573 áskerı bóliminde tájirıbelik aprobatsııa barysynda rastaldy. Sátti testileýden keıin joba Qazaqstan Respýblıkasy ІІM Ulttyq ulanynyń barlyq bólimshelerinde avtomattandyrylǵan psıhologııalyq monıtorıngtiń biryńǵaı quraly bolýǵa daıyn.
E-Nazar-dy engizý Qazaqstan Respýblıkasy ІІM Ulttyq ulanynyń qyzmetti tsıfrlandyrý jáne áskerı qyzmetshilerdi psıhologııalyq qamtamasyz etý júıesin jetildirý baǵytyndaǵy kezekti qadamy boldy.
Aıta keteıik, jaqynda Ulttyq ulan alǵash ret jasandy ıntellekt qoldanylǵan kontsert berdi.
QR ІІM Ulttyq ulanynyń áskerı qyzmetshileri shomylý maýsymy kezinde azamattardyń qaýipsizdik mádenıetin arttyrýǵa baǵyttalǵan anımatsııalyq beınerolık ázirledi. Joba zamanaýı jasandy ıntellekt tehnologııalarynyń kómegimen júzege asyrylǵan bolatyn.
