10 myńnan astam sarbazǵa kredıt boıynsha kanıkýl berildi - mınıstrlik

ASTANA. KAZINFORM – Qazir ásker qataryna kelgen sarbazdarǵa nesıelerin óteý keıinge shegerilip jatyr. Bul týraly QR Qorǵanys mınıstriniń orynbasary Darhan Ahmedıev málim etti.

«Qarýly Kúshterdi tsıfrlyq transformatsııalaý áskerı qyzmet ótkerýdiń tartymdylyǵyn arttyrý is-sharalaryn iske asyrýǵa múmkindik berdi. Onyń biri merzimdi áskerı qyzmetke shaqyrylǵan azamattarǵa kredıti boıynsha kanıkýl berýge qatysty. Azamattardy merzimdi áskerı qyzmetke shaqyrý týraly buıryq tikeleı júıede shyǵarylyp, birden Memlekettik kredıttik bıýroǵa jáne Birinshi kredıttik bıýro servısine beriledi. Osy uıymdar nesıesi bar sarbazdardy birden anyqtap, derekterdi bankter men shaǵyn nesıe uıymdaryna joldaıdy. Budan keıin qaryzdy keıin óteý týraly sheshim shyǵarylady», - dedi D. Ahmedıev Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, bank sarbazdardyń bereshegin qaıtarý merzimin 14 aıǵa deıin shegerdi. Bul turǵyda endi merzimdi áskerı qyzmetshi 12 aı Qarýly Kúshter qatarynda bolǵan kezeńde, sondaı-aq úıge oralǵan soń 2 aı merzimde qaryzyn óteýden bosatylady.

«Osy eki aıdyń ishinde áskerden oralǵandar jumysqa ornalasyp, qaryzyn óteı bastaıdy. Jalpy somasy 4 mlrd teńgege 15 myń qaryz boıynsha merzimdi áskerı qyzmetke shaqyrylǵan 10 myńnan astam adamǵa kredıt boıynsha kanıkýl berildi», - dedi mınıstrdiń orynbasary.

Buǵan deıin Aqtaýda teńiz jaıaý áskerleri brıgadasynyń júzge jýyq sarbazy kredıttik kanıkýl alǵanyn jazǵan edik.