10 myńnan asa qytaılyq týrıst Taıaý Shyǵystan evakýatsııalandy
ASTANA. KAZINFORM — 10 myńnan asa qytaılyq týrıst Birikken Arab Ámirlikteri (OAE), Oman, Saýd Arabııasy jáne basqa elderden aman-esen oraldy, dep habarlaıdy Sınhýa Qytaı Syrtqy ister mınıstrliginiń baspasóz qyzmetine silteme jasap.
Qytaı SІM-iniń resmı ókili Go Tszıakýn vedomstvolyq baspasóz konferentsııasynda sońǵy kúnderi vedomstvo Qytaı azamattyq avıatsııa basqarmasymen birlesip, qytaı áýe kompanııalarynyń ótkizý qabiletin edáýir arttyryp, Taıaý Shyǵysqa shuǵyl reısterdi jibergenin málimdedi. Bul sharalar sol elderde qalyp qoıǵan qytaılyq saıahatshylardy evakýatsııalaýǵa baǵyttalǵan.
Sheteldegi Qytaı elshilikteri men konsýldyqtary óz áreketterin jergilikti bılik organdarymen úılestirip, áýe kompanııalarynyń reısterin oryndaýyna kómek kórsetedi, qaýipsizdik týraly eskertýler men reıs kestelerin ýaqytyly jarııalaıdy, sondaı-aq qalyp qoıǵan jolaýshylarǵa qoldaý kórsetedi.
Go Tszıakýn atap ótkendeı, AQSh, Izraıl jáne Iran arasyndaǵy qaqtyǵys Taıaý Shyǵystaǵy áýejaılardyń jumysyn ýaqytsha toqtatýǵa ákep soqty. Qytaı SІM-i Qytaı azamattaryna Iranǵa kórshiles elder men áskerı qaqtyǵysqa qatysqan aımaqtarǵa sapardan ýaqytsha bas tartýdy qaıta usynady.
Sondaı-aq, tıisti elderdegi Qytaı elshilikteri men konsýldyqtary qajetti kómek qajet bolǵan jaǵdaıda óz azamattaryna barynsha qoldaý kórsetetinin aıtty.
Osydan buryn Nıderland elshiligi ýaqytsha Irannan Ázerbaıjanǵa kóshirilgenin jazǵan bolatynbyz.
