10 myńnan 150 myńǵa deıin: elimizde fotosessııa baǵasy qansha

Kók maısa tabıǵat, jasyl jelekke kómkerilgen saıabaq, gúlge oranǵan qala, kúnniń batýy men ózen-kól jaǵasyndaǵy sát – daıyn alań. Sondyqtan da jyldyń dál osy mezgilinde fotosessııa qyzmetine suranys artady.

Jazdaǵy fotosessııa baǵasyna birneshe faktor áser etedi. Birinshiden, fotograftyń kásibı sheberligi men tájirıbesi. Bul isti jańa bastap jatqan mamandardyń tarıfi tómen. Al bilikti ári suranysy joǵary fotograf óz qyzmetin joǵary baǵalaıdy.

Sonymen birge tarıfke fotoǵa túsý ýaqytynyń uzaqtyǵy da baılaýly. Bir saǵattyq fotosessııa baǵasy áldeqaıda tómen. Al eger birneshe saǵatqa, birneshe orynǵa barý qajet bolsa aqysy eselenedi. Fotolardy óńdep, árlep, jamanyn jasyryp, jaqsysyn asyryp berý de aqyrǵy qunǵa áser etedi.

Eger túsirilim fotostýdııada ótse fotograf qyzmetine jalǵa alý quny qosylady. Fotostýdııa fotograftyń menshigi bolsa, onyń óz artyqshylyǵy bar. Sonymen birge qala syrtyna shyǵý, fotoǵa túsýge arnalǵan qosymsha kórnekilikti jalǵa alý, bet árleýshi men stılıst maman qyzmeti nemese kıimdi jalǵa alý shyǵyndy kóbeıtedi.

Baǵaǵa túsirilim formaty da áser etedi. Ol jeke, otbasylyq, love story, balalarǵa arnalǵan jáne kommertsııalyq fotosessııa dep bólinedi. Árqaısynyń jóni, daıyndyǵy bólek bolǵan soń baǵasynda da aıyrmashylyq bar.

Máselen Kókshetaý qalasynda stýdııadaǵy otbasylyq fotosessııa baǵasy 30 000 teńge. Bul tórt adamnan turatyn otbasyna arnalǵan baǵa. Eger adam sany odan kóp bolsa ár janǵa qosymsha 3 000 teńge tóleıdi. Nátıjesinde 40 fotony óńdep, elektrondy túrde jiberedi. Túsirilim fotoaımaqta nemese aq tústi bólme ishinde júrgiziledi. Dál osylaı tek balany fotoǵa túsirse, baǵasy – 20 000 teńge. Janyna túsetin ár janǵa qosymsha 5 000 teńge tóleıdi.

Petropavl men Oral qalalarynda eskpress túsirilim, ıaǵnı bar bolǵany 30 mınýttyq qyzmet quny 10 000 teńge. Al Taraz qalasynda fotosessııa baǵasy 20 000 — 30 000 teńge, eger 50 000 -70 000 teńge tólese kásibı maman bir saǵattyq túsirilim jasap beredi. Qazir suranys joǵary. Bir aı buryn jazylyp, josparlap qoıǵan durys. Keıbir fotostýdııa birneshe fotosessııa toptamasyn usynady. Baǵasy 150 000 teńgege deıin jetedi.

Shymkentte fotosessııanyń ortasha baǵasy 15-20 myń teńge, keı jerlerde 50-70 myń teńgege deıin barady. Uzaqtyǵy 2-3 saǵatqa sozylatyn fototúsirilim baǵasy – 70 – 100 myń teńge. Bul qyzmetke kóp foto kiredi, sonymen birge túsirilim aımaǵyn tańdap, túr-tulǵańyzdy soǵan sáıkestendiredi. Keıde qyzmet aqysyna bet árleýshi men stýdııany jalǵa alý quny kiredi. OLX arqyly quny 20 000 – 40 000 teńge bolatyn fotosessııa qyzmeti tabylady. Al neırofotosessııa baǵasy 5 myń teńgeden bastalyp, 50 myń teńgege deıin jetti.

Elimizdegi qalalar ishinde Qostanaıda baǵa tómen. Fotosesııa quny 13 000 teńgeden bastalady. Al Pavlodar, Petropavl, Oral men Shymkentte 15 000 teńge jáne odan joǵary.

Qyzylorda, Kókshetaý, Jezqazǵan, Taraz jáne Almatyda baǵa 20 000 teńgeden bastalady. Túrkistan, Aqtóbe, Qaraǵandy qalalarynda 23 000 – 25 000 teńge bolyp tur. Taldyqorǵan, Astana men Aqtaý qalalarynyń turǵyndary eń kem degende 30 000 teńge tóleıdi. Eń qymbaty Óskemen jáne Semeıde. Munda 35 000 teńge jánee 40 000 teńgeden bastalady. Eń qymbat fotosessııa quny 100 – 150 myń teńgege deıin jetedi.

Eske salsaq, buǵan deıin Qazaqstandaǵy atpen serýendeý qyzmetiniń baǵasy jazyldy.