10 myńǵa jýyq ata-ana balalar qaýipsizdigi boıynsha túsindirý jumystaryna qatysty
ASTANA. KAZINFORM — Elordada mamandar balalardyń terezeden qulaý derekteriniń áli de ózekti másele bolyp otyrǵanyn aıtyp, ata-analarǵa qaýipsizdik erejelerin saqtaýdyń mańyzyn eskertti. Bul týraly Astana qalasynyń ákimdigi málim etti.
Olardyń aıtýynsha, masaǵa qarsy torlar balany qulaýdan qorǵamaıdy jáne jalǵan qaýipsizdik sezimin qalyptastyrady.
Astanada balalardyń terezeden qulaýy — kóktem-jaz mezgilinde balalar jaraqatynyń eń ózekti sebepteriniń biri bolyp otyr. Profılaktıkalyq jumystar turaqty júrgizilgenine qaramastan, jyl saıyn osyndaı ondaǵan oqıǵa tirkelip, sonyń saldarynan balalar aýyr jaraqat alyp, keı jaǵdaıda qaıǵyly jaǵdaıǵa ushyraıdy.
Bul týraly elordanyń Kommýnıkatsııalar qyzmetinde ótken brıfıngte Astana qalasyndaǵy «№ 2 Kópsalaly qalalyq balalar aýrýhanasy» ShJQ MKK medıtsınalyq bólim jónindegi dırektordyń orynbasary Dınat Kójekenov, Astana qalasy TJD Tótenshe jaǵdaılardyń aldyn alý basqarmasy bastyǵynyń m. a. Álı Arǵynbaev, Astana qalasy Polıtsııa departamenti Qoǵamdyq qaýipsizdik basqarmasy bastyǵynyń orynbasary polıtsııa podpolkovnıgi Erkin Janabil málim etti.
Spıkerlerdiń aıtýynsha, Astana qalasyndaǵy № 2 Kópsalaly qalalyq balalar aýrýhanasynyń derekteri boıynsha, zardap shegýshilerdiń basym bóligin 1 jastan 6 jasqa deıingi balalar quraıdy. Terezeden qulaý saldarynan olar aýyr bas-mı jaraqattaryn, súıek synýlaryn jáne ishki aǵzalardyń zaqymdanýyn alyp, uzaq ýaqyt emdelýge jáne ońaltý sharalaryna muqtaj bolǵan.
Mamandardyń aıtýynsha, jazataıym jaǵdaılardyń basym bóligi myna sebepterden bolady: balalar eresekterdiń qaraýynsyz qalady, ashyq terezeler men balkondarǵa erkin qol jetkizedi, tereze mańynda jıhaz ornalasady, al masaǵa qarsy torlar qaýipsizdik týraly jalǵan túsinik qalyptastyrady. Kóp jaǵdaıda torǵa súıenip qalǵan balanyń salmaǵyn kótere almaı, nátıjesinde qulap ketti.
Elordada balalardyń terezeden qulaýyn boldyrmaýǵa baǵyttalǵan keshendi sharalar turaqty túrde júzege asyrylyp keledi.
2026 jyldyń naýryz aıynan bastap Tótenshe jaǵdaılar departamentiniń qyzmetkerleri múddeli qyzmettermen birlesip, 2,5 myńnan astam kópqabatty turǵyn úıdi aralap, shamamen 11 myń jadynama taratyp, 12 myńnan astam turǵynmen túsindirý jumystaryn júrgizdi.
ıÝvenaldy polıtsııa jáne volonterlik uıymdarmen birlesip uıymdastyrylǵan «Qaýipsiz tereze» aktsııasy aıasynda kópbalaly otbasylar men kishkentaı balalary bar otbasylardyń páterlerine 1 028 tereze qulpy-blokıratory tegin ornatyldy.
53 mektepte jáne 35 balabaqshada profılaktıkalyq dárister ótkizildi. Aqparattyq materıaldar ata-analar chattary, MIB jáne PIK arqyly taratylýda. Sonymen qatar qoǵamdyq oryndarda taqyryptyq beınerolıkter kórsetilip, podezder men lıftilerde balalar qaýipsizdigi jónindegi materıaldarǵa baǵyttaıtyn QR-kody bar jadynamalar ornalastyrylǵan.
Jyl basynan beri Polıtsııa departamentiniń qyzmetkerleri 5 652 profılaktıkalyq dáris ótkizip, shamamen 10 myń ata-ananyń qatysýymen 275 ata-analar jınalysyn uıymdastyrdy. Sondaı-aq, 900-den astam jadynama taratylyp, 2 900 úı chattary men 1 500 ata-analar chatyna aqparat joldandy.
Polıtsııa qyzmetkerleri balalardyń qaýipsizdigin qamtamasyz etý jónindegi mindetterdi oryndamaǵan jaǵdaıda ata-analar Qazaqstan Respýblıkasy Ákimshilik quqyq buzýshylyq týraly kodeksiniń 127-babyna sáıkes ákimshilik jaýapkershilikke tartylýy múmkin ekenin eskertedi.
— Ata-analar balalardy qaraýsyz qaldyrmaýy, olardyń tereze aldyna shyǵýyna jol bermeýi, tereze mańyndaǵy jıhazdardy alyp tastaýy, balalarǵa arnalǵan qulyptar men ashylýdy shekteıtin qurylǵylar ornatýy, masaǵa qarsy torlarǵa senbeýi, balalarǵa qaýipsiz minez-qulyq qaǵıdalaryn turaqty túsindirip otyrýy qajet, — deıdi spıkerler.
Mamandardyń aıtýynsha, balalardyń terezeden qulaý jaǵdaılarynyń basym bóliginiń aldyn alýǵa bolady. Memlekettik organdar ata-analardy barynsha muqııat bolýǵa, qaýipsizdik sharalaryn saqtaýǵa jáne birneshe mınýttyq salǵyrttyqtyń orny tolmas qaıǵyǵa ákelýi múmkin ekenin este ustaýǵa shaqyrady.
Otbasy men qoǵamnyń birlesken kúsh-jigeri arqyly ǵana balalardyń ómiri men densaýlyǵyn saqtaýǵa bolady.
