10 myń áleýmettik qyzmetkerdiń beıindi mamandyǵy joq – Svetlana Jaqypova
ASTANA. KAZINFORM – 2025 jyldyń 1 qańtarynan áleýmettik qyzmet kórsetetin ortalyqtar lıtsenzııalaýdan ótedi. Bul týraly búgin BAQ ókilderimen kezdesken Eńbek jáne halyqty áleýmettik qorǵaý mınıstri Svetlana Jaqypova aıtty.
«Elimizde 732 myńnan astam múgedek adam bar. Onyń 201 myńy zeınet jasyndaǵy adamdar, shamamen 112 myńy - 18 jasqa deıingi balalar. Túrkistan, Almaty, Qaraǵandy, Jambyl oblystarynda 41 myńnan 101 myńǵa deıin múmkindigi shekteýli jan bar. Búgingi kúngi basty másele – áleýmettik qyzmetterdiń sapasy. Sapany qalaı kóterý kerek, múgedektigi bar adamdarǵa qandaı jaǵdaı jasaý qajet degen máselelerge baılanysty jumysymyzǵa ózgerister engizdik. 2025 jyldyń 1 qańtarynan bastap, áleýmettik qyzmetter lıtsenzııalaýdan ótedi», - dedi mınıstr.
Onyń atap ótýinshe, múmkindigi shekteýli jandarǵa áleýmettik qyzmet kórsetetin ortalyqtar birqatar shartqa sáıkes jumysyn úılestirýi tıis. Sondaı-aq mınıstr elimizdegi áleýmettik qyzmetkerlerdiń tolyq tizilimi jasaqtalǵanyn atap ótti.
«Atalǵan tizilimge sáıkes, bizde 10 myń áleýmettik qyzmetkerdiń beıindi mamandyǵy joq. Sondyqtan da biz olardyń biliktiligin kóterýdi qolǵa alyp otyrmyz. Óıtkeni, salada 12-14 jyl jumys istegen mamandar bar. Áleýmettik qyzmetterdiń sapasyn arttyramyz desek, áleýmettik qyzmetkerlerdiń biliktiligin arttyrýymyz qajet. Osyǵan oraı, mınıstrlik elimizdegi 14 joǵary oqý ornymen memorandým jasady. Oǵan sáıkes, áleýmettik qyzmetkerlerdiń biliktiligin arttyrýǵa baǵyttalǵan 2 aılyq kýrstar bolady», - dedi Svetlana Jaqypova.
Buǵan deıin Svetlana Jaqypova el azamattarynyń zeınetke erte shyǵý múmkindigine qatysty pikir bildirgenin jazǵan edik.
