10 mıllıon teńge salynǵan seıfti urlaǵan qostanaılyq ustaldy
QOSTANAI. QazAqparat - Qostanaı oblysynda «Páter» jedel aldyn alý sharalary barysynda qomaqty qarjy urlaǵan er adam ustaldy, dep habarlaıdy QazAqparat.
Aqparatty oblystyq polıtsııa departamentiniń baspasóz qyzmeti taratty. «2019 jylǵy 30 qańtarda Qostanaı qalasyndaǵy 5 shaǵyn aýdanda qomaqty qarjy urlaǵan kúdikti qolǵa tústi. Ol páterge kirip, ishinde 10 mln teńge jáne altyn buıymdar bolǵan seıfti urlap áketken. Jalpy shyǵyn - 11 mln teńge», - delingen PD baspasóz habarlamasynda.
Osy iske qatysty polıtseıler 30 jastaǵy qala turǵynyn ustady. Buǵan qosa, tártip saqshylary taǵy birneshe urlyq oqıǵalaryn ashty. Jaqyn kúnderi Qusmuryn aýylynyń 21 jastaǵy turǵyny qolǵa túsken. Ol 24 qańtarda tún mezgilinde aýyl dúkeniniń esigin buzyp, aqsha, altyn buıymdar jáne azyq-túlikterdi urlap ketken. Shyǵyn kólemi - 600 myń teńge.
«Páter» jedel aldyn alý sharalary kezinde uıaly telefon urlyqtary da ashyldy. 9 mobıldik qurylǵy ıelerine qaıtaryldy.
