10 maýsymǵa deıin Astananyń barlyq qoǵamdyq tamaqtaný mekemeleri tekseriledi - ákimdik
ASTANA. QazAqparat - Búgin Astana qalasynyń ákimi Ádilbek Jaqsybekovtiń basshylyǵymen ótken kezekti apparattyq jıynda demalys kúnderi tolassyz jaýǵan nóser saldaryn joıý máseleleri men elordadaǵy sanıtarlyq-epıdemıologııalyq jaǵdaı talqylandy.
Qala basshysy elordanyń sanıtarly-epıdemıologııalyq jaǵdaıyna toqtala kelip, turǵyndardyń jappaı ýlanýy qoǵamdyq tamaqtaný oryndaryndaǵy tıisti sanıtarlyq normalardyń, azyq-túlikti saqtaý erejeleriniń saqtalmaýynan ekendigin atap ótti.
«Azyq-túlikti durys saqtamaý, antısanıtarlyq jaǵdaı, tamaq ónerkásibi salasy qyzmetkerleriniń kásibı deńgeıiniń tómendigi, baqylaýdyń joqtyǵy - munyń barlyǵy qaladaǵy túıtkildi máselege aınalyp otyr. Dámhanalar men ashanalardyń jumysy baqylanbaıdy. Bul máselelerdi sheshý úshin qalanyń barlyq quzyretti qyzmetteri jumyldyrylyp, arnaıy reıd ótkizip, baqylaýdy kúsheıtý qajet. 10 maýsymǵa deıin Astananyń barlyq qoǵamdyq tamaqtaný mekemelerinde tıisti tekseris jumystaryn ótkizýdi buıyramyn», - dedi ákim.
