10 maýsymda eski úlgidegi 500 teńgelik banknottar aınalymnan shyǵady
ALMATY. QazAqparat – Qazaqstan Ulttyq banki 2020 jylǵy 10 maýsymda 2006 jylǵy úlgidegi nomınaly 500 teńgelik banknottar aınalymnan shyǵady. Bul týraly QazAqparat Ulttyq banktiń baspasóz qyzmetine silteme jasap habarlaıdy.
Qatar aınalys kezeńinde 2006 jylǵy úlgidegi nomınaly 500 teńgelik banknottar zańdy tólem quraly bolyp tabylady jáne tólemder men aqsha aýdarymdarynyń barlyq túrleri boıynsha Qazaqstan Respýblıkasynyń búkil aýmaǵynda qabyldanýǵa mindetti.
2020 jylǵy 10 maýsymǵa deıin qosa alǵanda eski úlgidegi banknottardy tólem quraly retinde qabyldaýdan bas tartýǵa jol berilmeıdi . Zańdy tólem quraly bolyp tabylatyn banknottar men monetalardy qabyldaýdan bas tartý Ákimshilik quqyq buzýshylyq týraly Qazaqstan Respýblıkasy Kodeksiniń 206-babyn buzýǵa ákep soqtyrady.
Eski jáne jańa úlgilerdegi banknottardyń qatar aınalysy kezeńinde 2006 jylǵy úlgidegi nomınaly 500 teńgelik banknottardy qabyldaýdan bas tartý faktileri týyndaǵan jaǵdaıda, tıisti sharalar qabyldaý úshin Ulttyq Banktiń aýmaqtyq fılıalyna ótinish jasaý qajet.
2020 jylǵy 10 maýsymnan keıin (kezeń aıaqtalǵan soń):
- ekinshi deńgeıdegi bankter qatar aınalys kezeńi aıaqtalǵan kúnnen bastap 12 aı ishinde eski úlgidegibanknottardy qabyldaıdy jáne qoldanystaǵy aqsha belgilerine aıyrbastaıdy;
- Ulttyq Banktiń fılıaldary ekinshi deńgeıdegi bankterdiń qabyldaý jáne aıyrbastaý merzimi aıaqtalǵan soń taǵy 3 jyl ishinde eski úlgidegi banknottardy qabyldaıdy, sondaı-aq olardy jańa úlgidegi aqsha belgilerine aıyrbastaıdy.
Osylaısha, 2020 jylǵy 10 maýsymnan keıin 2006 jylǵy úlgidegi nomınaly 500 teńgelik banknottar zańdy tólem quraly bolyp tabylmaıdy.
Sonymen birge, 2017 jylǵy úlgidegi nomınaly 500 teńgelik banknottar aınalysta bolady jáne tólemderdiń barlyq túrleri boıynsha Qazaqstan Respýblıkasynyń búkil aýmaǵynda kórsetýli quny boıynsha, sondaı-aq bank shotyna esepke alý jáne aýdarý úshin qabyldaýǵa, barlyq bankter men Ulttyq poshta operatory aqsha quralyn aıyrbastaýǵa mindetti bolady.
