10 mamyrda elimizdiń birneshe aımaǵynda jel kúsheıip, shańdy daýyl soǵýy múmkin
ASTANA. KAZINFORM – «Qazgıdromet» RMK sınoptıkteri 10 mamyrdaǵy Qazaqstan aýmaǵy boıynsha aýa raıy boljamyn jarııalady.
Jeksenbi kúni elimizdiń barlyq aımaǵynda turaqsyz aýa raıy kútiledi. Kóptegen óńirde naızaǵaı oınap, jańbyr jaýyp, burshaq túsýi yqtımal. Sonymen qatar jeldiń kúsheıýi baıqalady.
Ońtústik-batys, ońtústik, ońtústik-shyǵys jáne shyǵys aımaqtarynda jańbyr jaýady dep boljanyp otyr. Respýblıka boıynsha túngi jáne tańerteńgi ýaqytta tuman túsýi múmkin. Ońtústik óńirlerde shańdy daýyl soǵýy yqtımal.
Qyzylorda, Jetisý, Almaty, Jambyl, Túrkistan, Ulytaý, Qaraǵandy, Aqtóbe, Aqmola, Pavlodar, Abaı jáne Shyǵys Qazaqstan oblystarynyń keıbir bólikterinde joǵary órt qaýpi saqtalady. Sondaı-aq Qyzylorda oblysynyń shyǵysy, Abaı oblysynyń ońtústigi men ortalyǵy, Jetisý oblysynyń ońtústik-shyǵysy men ońtústiginde tótenshe órt qaýpi bar.
Aıta ketsek, budan buryn «Qazgıdromet» RMK elimizdegi aýa sapasyna qatysty boljamyn jarııalady.
