10 kúnnen keıin júregi toqtady: Ádilet Zeınel Uldananyń qalaı qaıtys bolǵanyn aıtty
ASTANA. KAZINFORM — Feldsher Uldana Myrzýannyń qazasyna qatysty sotta onyń kúıeýi Ádilet Zeınelden jaýap alý jalǵasyp jatyr. Ol jubaıy aýrýhanaǵa jetkizilgennen keıin otaǵa qalaı qatysqanyn aıtyp berdi.
Búgingi sot otyrysynda prokýror suraqtaryna bergen jaýabynda ol áıelin saǵat 11:00 shamasynda kórgenin aıtty.
— Ol es-tússiz jatty, búkil denesi qan boldy. Basynyń aınalasynda kóptegen zat jatty. Dárigerler kıimin sheship, qaıshymen kesken. Basynyń janynda kirpish synyqtary, kondıtsıonerge uqsaıtyn temir jáne basqa da usaq zattar boldy. Ota jasalǵannan keıin oqıǵa ornyna bardyq. Sol kezde kondıtsıonerdiń qaldyqtaryn kórmedik, tek kirpishter jatty, — dedi marqumnyń kúıeýi.
Ádilet Zeıneldiń aıtýynsha, ol otaǵa tikeleı qatyspaǵan jáne hırýrgııalyq aralasý júrgizbegen. Ota kezinde operatsııalyq blokta assıstent retinde bolyp, qajetti medıtsınalyq quraldardy ákelip otyrǵan.
— Otaǵa qatysqan joqpyn, biraq assıstent retinde boldym. Bizde túrli assıstentter bolady. Biri dáriger-neırohırýrgpen birge ota jasaıdy, endi biri quraldardy berip turady. Men qajetti quraldardy ǵana jetkizip otyrdym, — dedi jábirlenýshi.
Ol sondaı-aq otanyń josparly operatsııalyq blokta jasalǵanyn, al bul blok senbi kúnderi ádettegi rejımde jumys istemeıtinin atap ótti.
Ádilet Zeıneldiń aıtýynsha, Uldana on kún boıy, 8-18 qarasha aralyǵynda aýrýhanada jatqan. Bul aralyqta feldsher esin jıǵan joq. Tek saýsaǵyn qımyldatty, biraq sóılespedi jáne kózin ashpady.
— Biz 10 kún boıy Uldananyń anammen jáne ápke-sińlilerimen birge aýrýhanadan shyqpadyq. Meniń týystarym jáne Uldananyń týystary sol jerde boldy. Dál 18 qarashada men nesıe tóleýge kettim. Qaıtyp kele jatqanymda jansaqtaý bóliminen habarlasyp, onyń barlyq aǵzalary jumysyn toqtatyp jatqanyn aıtty. Bizdi bul aqparatqa daıyndady. 18 qarasha kúni shamamen saǵat 10 jarymda júreginiń toqtaǵanyn habarlady, — dedi Ádilet Zeınel.
Jábirlenýshi Ádilet Zeınelden jaýap alý jalǵasyp jatyr.
Eske sala ketsek, feldsher Uldana Myrzýan ólimine qatysty alǵashqy sot otyrysy 18 tamyzda bastalǵan edi.
Buǵan deıin Ádilet Zeınel áıelimen ótken sońǵy saǵattar týraly aıtyp berdi.
