10 kún úıindi astynda: Nepalda eki adam tiri qutqaryldy
ASTANA. KAZINFORM — Nepalda joıqyn sý tasqyny bolǵannan keıin 10 kún ótken soń qutqarýshylar úıindi astynan eki adamdy tiri tapty. Olardyń biri – úıindi astynda qalǵan áıel bolsa, ekinshisi – sý elektr stantsııasynyń tonnelinde bolǵan Qytaı azamaty. Bul týraly BILD agenttigi jazdy.
Shamamen 60 jastaǵy áıel Katmandý mańyndaǵy Nývakot aýdanynda qıraǵan úıdiń astynan tabyldy. Qutqarýshylar ony úıindi astynan shyǵaryp, tikushaqpen aýrýhanaǵa jetkizdi.
Al nepaldyq áskerı qyzmetkerler men Ońtústik Koreıadan kelgen qutqarýshylar birlesip, Upper Trishuli sý elektr stantsııasynyń tonnelder júıesinen Qytaı azamatyn tapty. Mamandar zardap shekken adamǵa jetý úshin tonneldiń ishine shamamen 225 metr kirgen. Oǵan alǵashqy medıtsınalyq kómek kórsetilip, keıin tikushaqpen qaýipsiz jerge evakýatsııalandy.
Buǵan deıin, bir kún buryn, Trishuli sý elektr stantsııasynyń tonnelinen taǵy eki nepaldyq jumysshy tiri qutqarylǵan edi. Osylaısha, sońǵy eki kúnde qutqarýshylar úıindiler men tonnelderden tórt adamdy tiri tapty.
Bılik basqa da tonnelderde aman qalǵan adamdar bolýy múmkin degen úmitte. Qazirgi tańda 12 gıdroenergetıkalyq nysanda jumys istegen shamamen 900 adam iz-túzsiz joǵalǵandar qatarynda. Olardyń 500-ge jýyǵy jer astynda qalýy múmkin.
Sý tasqyny 26 tamyzda Nepal men oǵan irgeles Tıbet aýmaǵynda boldy. Aldyn ala boljam boıynsha, apatqa muzdyqtyń opyrylýy sebep bolýy múmkin.
Nepalda qaza tapqany rastalǵan adamdardyń sany 1344-ke jetti, al 4900-ǵa jýyq adam habar-osharsyz ketkender qatarynda. Tıbette 31 adamnyń qaza bolǵany jáne 531 adamnyń joǵalǵany habarlandy.
