10 qyrkúıekte Kókshetaý JEO qurylysy bastalady
ASTANA. KAZINFORM — 10 qyrkúıekte Kókshetaý jylý elektr ortalyǵynyń qurylysy bastalady. Bul týraly búgin Aqmola oblysynda «Kókshetaý energo» JShS ujymymen kezdesken Energetıka mınıstri Almasadam Sátqalıev aıtty.
«Biz kómirdi umytpaımyz. Ne gaz, ne jel nemese boljammen atom dep otyrǵanymyz joq. Bizde bári qoldanylýy tıis. Kómir salasynda bizde ondaǵan myń jumys orny bar. 10 qyrkúıekte Kókshetaý jylý elektr ortalyǵynyń qurylysyn bastaımyz. Eń zamanaýı stansa bolady. Jeńildikpen qarjylandyrýǵa qatysty másele búginde sheshildi», — dedi Almasadam Sátqalıev.
Onyń atap ótýinshe, birinshi kezeńde stansa Qazaqstannyń ekologııalyq zańnama talaptaryna sáıkes salynatyn bolady.
Al ekinshi kezeńde stansa eýropalyq standarttarmen jumys isteıtindigi kózdelgen.
Ol úshin qosymsha jabdyqtar ornatylady.
Eske sala keteıik, Almasadam Sátqalıev munyń aldynda atom elektr stansasyna qajet sý Balqashtan alynatynyn, alaıda ol kóldiń sýynyń kólemine esh áser etpeıtinin aıtqan bolatyn.
