10 qazannan bastap, úlestik qurylys talaptary kúsheıtiletin boldy
ASTANA. QazAqparat - 10 qazanda Qazaqstanda úlestik qurylys salasyn qataıtatyn zań kúshine enedi. Bul týraly Astana qalalyq Memlekettik sáýlet-qurylys baqylaý basqarmasy basshysynyń orynbasary Dáýlet Dosqulov málimdedi, dep habarlaıdy «QazAqparat».
«Turǵyn úı qurylysynda úlestik qatysý týraly jańa zań 2016 jyldyń 10 qazanynan bastap kúshine enedi. Atalǵan zańnama alaqol qurylysshylardan tazartýǵa múmkindik beredi»,-dedi Dosqulov elordada ótken baspasóz máslıhatynda.
Osy rette ol zańnamaǵa sáıkes, úleskerler qarjysyn tartýdyń úsh tásili bar ekenin aıtyp, túsindirdi.
«Birinshisi - Kepildendirý qorynan kepildik alǵan kezde úleskerler qarjysyn tartý múmkindigi. Ekinshisi - ekinshi deńgeıli bankterdiń qatysýyn eskere otyryp, jergilikti atqarý organynyń ruqsatyn alǵanda. Úshinshi ádiste nysannyń qańqasyn turǵyzǵan kezde jáne jergilikti atqarý organynyń ruqsatyn alǵan ýaqytta múmkindik týady»,-dedi basqarma basshysynyń orynbasary.
Barlyq úsh tásilde de qurylysshy ókiletti kompanııany quryp, talaptarǵa saı jumys isteýi tıis.
«Atap aıtqanda, jer telimi, memlekettik saraptamadan ótken jobalaý-smetalyq qujattamasy bolýy kerek. Onda turǵyn úı nysandary qurylysyna shyǵyndardyń smetasy men barlyq ınjenerlik kommýnıkatsııalardy qosýdyń şaralary eskerilýi tıis. Osy talaptar oryndalǵanda qurylysshylar úleskerler qarjysyn tartýǵa quqyly»,-dedi ol.
Zańnamadaǵy jańashyldyqtar birinshi sanattaǵy qurylys-montajdaý jumystaryna lıtsenzııalar alý kezinde talaptardy qataıtýǵa jáne baspana qurylysyn baqylaýǵa múmkindik beredi.
Budan bólek ol úlestik qurylys boıynsha sharttardy bekitý rásimderin túsindirdi.
«Jańa zań aıasynda jergilikti atqarý organynda kelisim tirkelgen sátten bastap úlestik qatysýdyń atalǵan sharty bekitilgen bolyp esepteledi. Sáıkesinshe, ákimdik úleskerler sany men nysandar jaǵdaıy boıynsha monıtorıng júrgizedi»,-dedi Dosqulov.
Al, ekinshi deńgeıli bankterge qatysty toqtalsaq, olar qurylys barysy men qarjyny jumsaý qadamdaryn qadaǵalaıdy. Kepildendirý qory tarapynan da barlyq úderis tolyqtaı baqylanatyn bolady.
Búginde Astanada 200-ge jýyq turǵyn úı keshenderi salynýda. Onyń ishinde 30-dan astamy problemaly nysandar bar. 20 nysan qurylys kestesinen qalys kele jatqandyqtan, jergilikti atqarý organdardyń baqylaýynda tur.
