10 qańtar kúni Nur-Sultanda 283 saılaý ýchaskesi jumys isteıdi
Elordada qala ákiminiń orynbasary Baqtııar Mákenniń qatysýymen tótenshe jaǵdaılardyń aldyn alý jáne joıý jónindegi komıssııanyń otyrysy ótti. Jıynda elordada koronavırýs ınfektsııasynyń taralýyna jol bermeý, saılaýǵa daıyndyq jáne ony ótkizý kezinde qaýipsizdikti qamtamasyz etý sharalary talqylandy.
Qazirgi ýaqytta elordada táýligine 50-den 120-ǵa deıin naýqas tirkelip otyr. KVI dıagnostıkasyna táýliktik qýaty 12 250-ge deıingi 21 zerthana, 7 ınfektsııalyq jáne bir karantındik statsıonar jumyldyryldy. Barlyq zerthanalardyń júktemesi 25-ten 40% deıin bolyp otyr, kúnine 1 500-den 5 myńǵa deıin zertteý júrgiziledi. KVI dıagnozy rastalǵan statsıonarlardaǵy patsıentter sany 212 adamdy, pnevmonııamen 39 adam jatyr.
Saılaý ýchaskelerine qatysty toqtalsaq, qala aýmaǵynda barlyǵy 283 saılaý ýchaskesi ornalasqan, onyń 248-i ashyq jáne 35-i jabyq (medıtsınalyq ortalyqtar, aýrýhanalar, áskerı bólimder jáne t.b.)
5-8 qańtar aralyǵynda elordada saılaý komıssııalarynyń múshelerinen, senim bildirilgen tulǵalar men baıqaýshylardan koronavırýsqa PTR-synama alynǵan.
«Saılaý ýchaskelerinde jurttyń jappaı jınalýyna jol bermeý maqsatynda turǵyndar úshin arnaıy shyǵý joldary qarastyrylatyn bolady. Barlyq ýchaskeler daıyn bolýy jáne qajetti qorǵanys quraldarymen jabdyqtalýy kerek: dezınfektsııalyq kilemsheler, edendegi belgiler, qatysýshylardyń qozǵalysyna arnalǵan qorshaýlar men tosqaýyl taspalary, paıdalanylǵan jeke qorǵanys quraldaryn jınaýǵa jáne kádege jaratýǵa arnalǵan konteınerler, antıseptıkalyq zattar, jeke qorǵanys quraldary. Jalpy, qalanyń barlyq qyzmeti elorda turǵyndary 10 qańtarda azamattyq jáne konstıtýtsııalyq boryshyn esh kedergisiz oryndaı alýy úshin joǵary daıyndyq júrgizýi tıis», – dep atap ótti ákimniń orynbasary.
Jıyn qorytyndysy boıynsha Baqtııar Máken koronavırýs ınfektsııasyna qarsy is-qımyl boıynsha karantındik sharalardy kúsheıtýdi, barlyq saılaý ýchaskelerinde qaýipsizdik pasportynyń bolýyn jáne sanıtarlyq normalardyń saqtalýyn tekserýdi, qalalyq qyzmetterdiń jumysyn kúsheıtýdi tapsyrdy.
Esterińizge sala keteıik, elorda koronavırýstyń taralý qarqyny boıynsha «sary aımaqta» ornalasqan. Turǵyndar barlyq sharalardy, ıaǵnı betperde kıip, ara qashyqtyqty saqtaýy kerek.
