10 qańtar kúni Astanada dabyl júıesi iske qosylady
ASTANA. QazAqparat - Astana qalasynyń Tótenshe jaǵdaılar departamenti erteń kúndiz Astana qalasynyń qulaqtandyrý júıelerine tekserý júrgiziletinin jarııa etti, dep habarlaıdy QazAqparat tilshisi.
Departament qala turǵyndary men qonaqtaryn elektr dabyl kezinde sabyr saqtaýǵa shaqyrady.
«Qymbatty qala turǵyndary men qonaqtary! Osy jyldyń 10 qańtarynda saǵat 09:55-te tele-radıo arnalardy toqtatý jáne elektr dabyldardy qosý arqyly Astana qalasynyń qulaqtandyrý júıeleri tekseriledi», - delingen departamenttiń habarlamasynda.
Departament, sondaı-aq, tótenshe jaǵdaı oryn alǵan kezde nemese sondaı qaýip tóngen jaǵdaıda elektr dabyldar nemese basqa da dabyl quraldary iske qosylatynyn, onyń «Barshańyzdyń nazar aýdarýyńyzdy suraımyz!» biryńǵaı qulaqtandyrý dabylyn bildiretinin eske saldy. Bul dabyldy estigen kezde turǵyndar mindetti túrde aqparat qabyldaý quraldaryn (teledıdarlar, radıo jáne taǵy basqa) qosyp, is-áreketter týraly nusqaýlar men aqparatty alýy kerek.
