10-qabattan banki laqtyryp, kishkentaı balany jaraqattaǵan áıel sottaldy
SEMEI. QazAqparat - Semeıde onynshy qabattan shyny banki laqtyryp, 9 jasar balany jaraqattaǵan áıel jarty jylǵa bas bostandyǵynan aıyryldy, dep habarlaıdy QazAqparat 24.kz portalyna silteme jasap.
Semeıde 38 jastaǵy áıel eki lıtrlik qutyny 10-qabattyń balkonynan laqtyrǵany úshin sottaldy. Oqıǵa ótken jyldyń jaz aıynda oryn alǵan. Shyny ydys tómende oınap júrgen balanyń basyna qulap, qatty jaraqattaǵan. Al kináli tulǵa bul árekettiń ádeıi istelmegenin, tek ydystaǵy jumyrtqanyń qabyǵyn túsiremin dep baıqaýsyzda qolynan syrǵyp ketkenin aıtyp aqtaldy. Áıeldiń sol sátte ishimdik ishkeni de saraptama qorytyndysymen dáleldengen.
Sot ony 6 aıǵa bas bostandyǵynan aıyryp, jábirlenýshi tarapqa moraldyq shyǵyn retinde 500 myń teńge óndirý týraly sheshim qabyldady.
«Bankiniń óz salmaǵy bar. Fızıka zańyna súıensek, ol tómen quldıldaǵanda tipti aýyrlaı túsedi. ıAǵnı 10-qabattan jerge túskenshe, shamamen 30 metr bıiktikten balanyń basyna qulaǵanda jaraqattyń qandaı aýyr bolatyny aıtpasa da túsinikti», deıdi jábirlenýshiniń qorǵaýshysy Meıirhan Seıilbaev.
