10 eldiń sýretshileri Katonqaraǵaıdyń tabıǵatyn salady
ÓSKEMEN. QazAqparat - Shyǵys Qazaqstanda sýretshilerdiń halyqaralyq pleneri ótip jatyr. On kún boıy 10 eldiń sheberleri Katonqaraǵaıdyń kórkem tabıǵatyna qalam terbemek, dep habarlaıdy QazAqparat tilshisi.
Plenerge Germanııa, Frantsııa, Túrkııa, Ázerbaıjan, Ózbekstan, Qyrǵyzstan, Lıtva, Grýzııa,Reseı jáne elimizdiń birneshe óńirinen 20 sýretshi shaqyrtý alǵan. «Uly dala palıtrasy» degen taqyryppen ótetin shara «Rýhanı jańǵyrý», «Uly dalanyń jeti qyry» baǵdarlamalyq maqalalary men Jastar jylyn qabat ushtastyryp otyr.
«Mundaı plener Shyǵysta osymen ekinshi ret uıymdastyrylyp otyr. Byltyrǵy sharaǵa elimizdiń eń tanymal 20 sýretshisi qatysqan bolatyn. Sonyń arqasynda oblys mýzeıleriniń qory 135 týyndymen tolyqqan. Bıyl álem sýretshileri Katonqaraǵaıdaı tarıhı mekenniń aýrasyn jan-tánimen sezinip, keremet týyndylar dúnıege ákeledi degen úmitimiz bar. Sýret ónerine aýdarma qajet emes. Parıj ben Berlınnen, Tbılısı men Qazannan, Vılnıýs pen Ankaradan kelgen qylqalam sheberleriniń arqasynda Uly dalanyń uly tarıhy halyqaralyq kórmelerde sýret tilinde sóıleıtin bolady», - deıdi oblys ákiminiń orynbasary Ásem Núsipova.
Sýretshiler 4-11 maýsym aralyǵynda áıgili Rahman Qaınary men Bereldegi Patshalar jazyǵynda qona jatyp, sýret salatyny josparlanǵan.
«Altaı týraly óleń men poema, án men kıno kóp. Sodan da bolar, túrki áleminiń altyn besigin tanýǵa búkil álem qushtar. Plenerge qatysýshy ár sýretkerdiń kókirek kózi, sýret tili árqıly. Altaıdan alǵan shabyty sýretke tússe, keıin ol keskinder óz otandastarynyń bul jaqqa degen qyzyǵyshýlyǵyn oıatady. Plenerdiń maqsaty da sol», - deıdi sharanyń úılestirýshisi, belgili sýretshi Esenǵalı Sadyrbaev.
Plenerdiń qorytyndysy 13 maýsymda shyǵarylady. «Jastar arbaty» degen atpen boıaýy keýip úlgermegen tyń týyndylardyń kórmesi uıymdastyrylyp, ondaǵy sýretterdiń bir bóligi aımaq mýzeıleriniń sýret qoryn toltyrmaq.
Foto: altaynews.kz
