10 aıdyń ishinde kásiporyndarda 129 adam qaza tapty – Eńbek mınıstri
TALDYQORǴAN.QazAqparat - Aǵymdaǵy jyldyń 10 aıynda respýblıka kásiporyndarynda 1069 adam zardap shegip, onyń ishinde 129 adam qaza tapqan.
Bul jóninde Eńbek jáne halyqty áleýmettik qorǵaý mınıstri Birjan Nurymbetov Taldyqorǵanda «Jetisý sý qubyry» MKK ujymymen kezdesý barysynda málim etti, dep habarlaıdy QazAqparat tilshisi.
«Aǵymdaǵy jyldyń 10 aıynda respýblıka kásiporyndarynda 1069 adam zardap shekti, bul 2018 jyldyń sáıkes kezeńimen salystyrǵanda 13,2% - ǵa tómen. Onyń ishinde 129 adam qaza tapty, bul ótken jyldyń kórsetkishterinen 22,8%-ǵa tómen. Eger Almaty oblysy týraly aıtatyn bolsaq, óndiristik jaraqattanýdyń oń dınamıkasy saqtalýda. Aǵymdaǵy jyldyń 10 aıynda óńir kásiporyndarynda 24 qyzmetker zardap shekti, onyń 6 – y qaza boldy, bul ótken jyldyń osy kezeńimen salystyrǵanda 2-ge artyq», – dedi QR Eńbek jáne halyqty áleýmettik qorǵaý mınıstri Birjan Nurymbetov.
Atalǵan vedomstvonyń resmı málimetine sáıkes, memlekettik eńbek ınspektorlarynyń talaby boıynsha aǵymdaǵy jyldyń 10 aıynda elimizde 47 laýazymdy tulǵa qyzmetinen bosatyldy. Quqyq qorǵaý organdaryna 820 materıal jiberilip, 116 qylmystyq is qozǵaldy, onyń ishinde Almaty oblysy boıynsha 20 is bar, olar boıynsha qylmystyq is qozǵalmaǵan. Jumysshylardyń ómiri men densaýlyǵyna naqty qaýipke baılanysty, memlekettik eńbek ınspektorlarynyń talaby boıynsha 11 qural-jabdyq, 2 óndiristik nysan jáne 7 uıymnyń qyzmetine tyıym salyndy. Almaty oblysy boıynsha tyıym salý faktileri bolǵan joq.
