10 aıda óńdelgen taýarlar eksporty 23,3 mlrd AQSh dollaryna jetti - UEM

ASTANA. KAZINFORM – Bıyl qańtar-qazanda elimiz 68,5 mlrd dollardyń taýaryn eksportqa shyǵardy. Bul týraly búgin Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.

- Bıyl qańtar-qazanda syrtqy saýda aınalymy 116,9 mlrd AQSh dollaryn qurady. Eksport 68,5 mlrd AQSh dollaryna, onyń ishinde óńdelgen taýarlar eksporty 23,3 mlrd AQSh dollaryna jetti. Taýarlar ımporty 48,4 mlrd AQSh dollaryn qurady. Oń saýda balansy 33,4 paıyzǵa ósip, 20,1 mlrd AQSh dollaryna deıin ulǵaıdy, - dedi Nurlan Baıbazarov.

Onyń dereginshe, óńdeý ónerkásibinde oń ósý qarqyny saqtalyp otyr. Óndiris kólemi 5,3 paıyzǵa deıin jedeldedi. Ósý 14 óńirde tirkeldi. Eń úlken ósý qarqyny Qyzylorda, Mańǵystaý, Túrkistan, Qaraǵandy oblystarynda baıqalady.

- Óńdeý ónerkásibindegi ósim negizinen metallýrgııa óndirisiniń 7,2 paıyzǵa jáne mashına jasaýdyń 6,9 paıyzǵa ósýi esebinen qamtamasyz etildi. Budan basqa, hımııa ónerkásibi óndirisi - 8,4, farmatsevtıkalyq ónimder – 21, azyq-túlik – 2,1, metall buıymdary – 29,5 jáne jıhaz 12,8 paıyzǵa ósti. Taý-ken ónerkásibinde óndiris kólemi 0,1 paıyzǵa deıin baıaýlady. Bul munaı óndirýdiń 2 paıyzǵa jáne tabıǵı gaz óndirýdiń 0,3 paıyzǵa qysqarýyna baılanysty. Bul rette metall kenderin óndirý - 7,9, kómir óndirý 1,9 paıyzǵa artty, - dedi ol.