10 aıda quqyq qorǵaý organdary 8 myńnan astam esirtkimen baılanysty qylmystardy anyqtady - úılestirý keńesiniń otyrysy
ASTANA. Jeltoqsannyń 9-y. QazAqparat /Aıdar Ospanalıev/ - Búginde eldegi esirtkimen baılanysty jaǵdaıdy saýyqtyrý úshin quqyq qorǵaý jáne basqa da organdar tarapynan júıeli sharalar atqarylýda jáne bul baǵyttaǵy jumystar óz nátıjesin berip otyr.
Aǵymdaǵy jyldyń 10 aıynda quqyq qorǵaý organdary tarapynan 8 myńnan astam esirtkimen baılanysty qylmystar anyqtaldy. Bul týraly búgin Qazaqstan Respýblıkasynyń Quqyq qorǵaý organdarynyń úılestirý keńesiniń otyrysy barysynda jýrnalıstermen suhbattasqan Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
Onyń sózine qaraǵanda, atalmysh merzimde esirtki saýdasymen aınalysyp júrgen 9 uıymdasqan qylmystyq toptyń áreketteri áshkerelengen. Olar osy ýaqytqa deıin 44 esirtkimen baılanysty qylmystyq áreketterdi júzege asyrǵan. Sondaı-aq esirtkini kontrabandalyq jolmen taratýdyń 200 faktisiniń jol kesilip, 30-ǵa jýyq esirtki prıtondarynyń jumysyna tosqaýyl qoıylǵan. Al zańsyz aınalymnan 26 tonnaǵa jýyq esirtki alynǵan. «Buǵan qosa ókiletti organdar men qoǵamdyq uıymdar tarapynan saýyqtyrý sharalary júrgizilýde. Tek Іshki ister mınıstrliginiń bastamasymen buqaralyq aqparat quraldarynda jaǵdaıdy saýyqtyrý baǵytyndaǵy
8 myńnan astam materıaldar jarııalanyp, 7 myńnan astam esirtkige qarsy aktsııalar uıymdastyryldy. Sondaı-aq 400-ge jýyq dóńgelek ústel otyrystary men 700 sporttyq jarystar ótti», dedi resmı ókil.
Onyń sózine qaraǵanda, qazir esirtkige elitýshilerdi emdeý sharalary da mańyzdy bolyp otyr. Osyǵan qaraı elimizdiń densaýlyq saqtaý salasy turaqty túrde esirtkige qumartqandardyń arnaıy esebin jasap, emdeý sharalaryn júrgizýde.
