10 aıda Qaraǵandy oblysyna 530 mlrd teńge ınvestıtsııa tartyldy - Jeńis Qasymbek

NUR-SULTAN. QazAqparat - Bıylǵy jyldyń 10 aıynda Qaraǵandy oblysyna 530 mlrd teńge somasynda ınvestıtsııa tartyldy. Bul týraly atalǵan óńir basshysy Jeńis Qasymbek málim etti, dep habarlaıdy QazAqparat tilshisi.

«Bıylǵy jyldyń 10 aıynyń qorytyndysy boıynsha Qaraǵandy oblysyna 530 mlrd teńge ınvestıtsııa tartyldy, onyń 83%-y jeke menshik. Osy oraıda óńirde 12,5 myńnan astam jańa jumys orny ashylyp, 45 jańa ınvestıtsııalyq joba júzege asyrylýda. Onyń ishinde jyl sońyna deıin 11 jańa óndiris iske qosylady. Bul óz kezeginde 2,5 myńnan astam turaqty jumys ornymen qamtamasyz etedi. Sondaı-aq, búginde óńir ekonomıkasy damýdyń negizgi kórsetkishteri boıynsha oń dınamıkany kórsetýde. Oblystyń JІÓ-degi ónerkásip úlesi 50%-dan asady. Bıylǵy 10 aıdyń qorytyndysy boıynsha ónerkásip óniminiń kólemi 2,4 trln teńgeni qurap, 2,4%-ǵa ósti. Onyń ishinde óńdeý sektory 4,6%-ǵa artty», - dedi J. Qasymbek OKQ-de onlaın ótken baspasóz máslıhatynda.

Sondaı-aq, oblys basshysy aımaqtaǵy ónerkásip oryndarynyń shtattyq rejimde jumys istep jatqanyn aıtty.

«ArselorMıttal Temirtaý» jáne «Qazaqmys» júıe qurýshy kásiporyndary turaqty jumys isteýde. Bul rette álemdik naryqtarda mys pen bolat qunynyń ósýi baıqalady. Jyl qorytyndysy boıynsha oń dınamıkany 103%-ǵa deıin qamtamasyz etý josparlanýda«, - dedi ol.