Qaı mınıstrlikter men ákimdikter bıýdjet qarjysyn ıgere almaǵan

Bıyl 10 aıda 4 mınıstrlik pen 4 oblys ákimdigi bıýdjet qarajatyn eń kóp ıegere almaǵan. Bul týraly Úkimet otyrysynda Qarjy vıtse-mınıstri Dáýren Temirbekov aıtty, dep habarlaıdy Kazinform.

«Memlekettik bıýdjettiń shyǵystary - 98,2, respýblıkalyq bıýdjettiń shyǵystary – 99,4, jergilikti bıýdjetterdiń shyǵystary 97,2 paıyzǵa oryndaldy. Respýblıkalyq bıýdjet boıynsha somasy 18 trln teńgege shyǵystar júrgizildi. Atqarylmaý 107 mlrd teńgeni qurasa, onyń ishinde únemdeý 16 mlrd teńge boldy. Igerilmegeni – 91 mlrd. teńge. Igerilmeýdiń neǵurlym iri somalary Іshki ister, Mádenıet jáne aqparat; Sý resýrstary jáne ırrıgatsııa; Ekologııa jáne tabıǵı resýrstar mınıstrlikterinde qalyptasty», - dedi Dáýren Temirbekov.

Vıtse-mınıstr ıgerilmeýdiń negizgi sebepteri retinde konkýrstyq rásimderdi uzaq merzimde ótkizýdi, ónim berýshilerdiń taýarlardy jetkizbeýin, bıýdjettik baǵdarlamalardy (kishi baǵdarlamalardy) iske asyrý jóninde normatıvtik quqyqtyq aktilerdi ýaqtyly qabyldamaýyn, shot-faktýralar, atqarylǵan jumys aktileriniń ýaqtyly usynylmaýyn, tólem naqty kórsetilgen qyzmet kólemi boıynsha júrgizilgenin, mınıstrlikterdiń qaıta uıymdastyrylýyn atady.

«Jergilikti bıýdjetterdiń shyǵystary 10 trln teńgeni qurady. Atqarylmaǵany - 294 mlrd teńge. Bıyl óńirlerge 2 trln teńgege jýyq nysanaly transfertter kózdelgen. Olarǵa 1 qarashaǵa 1 trln 261 mlrd teńge bólingen. Onyń 94,4 paıyzy ıgerilgen. Atqarylmaǵany – 71 mlrd teńge, onyń ishinde 2 mlrd teńge – únemdeý. 69 mlrd teńge ıgerilmegen. Eń kóp ıgerilmeý Astana jáne Almaty qalalarynda, Mańǵystaý jáne Aqmola oblystarynda qalyptasty», - dedi ol.