10 aqpan kúngi aýa raıy boljamy
ASTANA. QazAqparat - 10 aqpan kúni Qazaqstannyń basym bóliginde atmosferalyq aǵymdardyń ótýine baılanysty keı jerlerde qar jaýady, respýblıkanyń ońtústiginde taýly aımaqtarda qar qatty jaýatyny kútilýde. Qazaqstannyń tek batysynda aýa raıy jaýyn-shashynsyz bolady. Jekelegen óńirlerde tuman, kóktaıǵaq, burqasyn, ekpindi jel boljanady, dep habarlaıdy QazAqparat.
«Qazgıdromet» RMK-nyń málimetinshe, Almaty, Jambyl, Túrkistan oblystarynyń keı jerlerinde tuman, kóktaıǵaq kútiledi, 15-22 m/s ekpinde jel soǵady. Jambyl oblysynda túnde jáne tańerteń jeldiń jyldamdyǵy 23-28 m/s kúsheıedi.
Shyǵys Qazaqstan oblysynyń jekelegen aýmaqtarynda tuman, burqasyn boljanady, jel 25 m/s artady.
Aqmola, Qaraǵandy oblystarynda keı jerlerde burqasyn kútiledi, jeldiń ekpini 15-20 m/s jetedi.
Qyzylorda, Mańǵystaý, Batys Qazaqstan, túnde jáne tańerteń Aqtóbe oblystarynyń keı jerlerin tuman basady. Qyzylorda, Mańǵystaý oblystarynda kóktaıǵaq bolady.
Soltústik Qazaqstan, Qostanaı, Pavlodar oblystarynda keı jerlerde burqasyn boljanady.
