10 adamdy órtten qutqarǵan aqmolalyq polıtseı «Aıbyn» ordenimen marapattaldy
KÓKShETAÝ. QazAqparat - 10 adamdy órtten qutqarǵan (onyń 7-eýi - bala) 25 jastaǵy polıtsııa serjanty Ashat Erkashev erligi úshin ІІІ dárejeli «Aıbyn» ordenimen marapattaldy, dep habarlaıdy QazAqparat tilshisi.
Aqmola oblystyq PD baspasóz qyzmetiniń deregi boıynsha, oqıǵa 2018 jyldyń 25 qarshasynda oryn alǵan.
«Men 5510 áskerı bóliminiń sarbazdarymen kezekshilikke shyqtym. Keshkilik ýaqytta patrýl kezinde eski áýejaı aýmaǵyndaǵy jeke sektor tusynan jarylystyń daýsy estildi. Daýys shyqqan jaqqa qaraǵanym sol edi, eki páterli turǵyn úıdiń janyp jatqanyn kórdim. Birden órt sóndirý brıgadasyn shaqyryp, ózim órt shyqqan úıge júgirdim. Terezeden úı ishinde kómek surap, jylap jatqan balalardy kórdim. Terezeni buzyp, ishke kirip, áskerı bólim sarbazdaryna balalardy shyǵaryp otyrdym. Bir páterdegi adamdardy tolyq qutqarǵan soń, ekinshi páterge baryp ondaǵy balalardy qaýipsiz jerge shyǵardyq. Keıin ekinshi ret úıge qaıta kirip, ishte qalyp qoıǵan adamdardyń bar-joǵyna taǵy bir ret kóz jetkizdik. Budan bólek, páterlerdiń biriniń ishinde turǵan eki birdeı gaz ballonyn syrtqa shyǵardyq. Osy kezde órt sóndirý brıgadasy men jedel járdem kóligi kelip jetti», - dep eske alady Ashat.
Polıtsııa qyzmetkeri bir páterdiń ishinen - 4 balany, ekinshi páterden - 3 balamen birge ata-anasyn qutqarǵan. Jalpy, 10 adamnyń ómirine arasha túsken.
«Balalardyń jan ushyryp jylaǵan daýysyn estigende, bar oıym olardy qutqarý boldy. Keıin bári sátti aıaqtalǵan soń ǵana qaýip-qaterdiń qanshalyqty bolǵanyn túsindim», - dep atap ótti beıbit kúnniń batyry QazAqparat tilshisine.
QR Prezıdentiniń Jarlyǵymen áskerı jáne qyzmettik mindetin atqarý kezinde kórsetken erligi jáne qaısarlyǵy, elimizdiń qorǵanys qabiletin nyǵaıtýǵa jáne ulttyq qaýipsizdikti qamtamasyz etýge, zańdylyq pen quqyqtyq tártipti nyǵaıtýǵa qosqan úlesi úshin polıtsııa serjanty Ashat Erkashev ІІІ dárejeli «Aıbyn» ordenimen marapattaldy.
