10-15 jyldan keıin sýtegimen júretin kólikter halyqqa qoljetimdi bolmaq
ASTANA. QazAqparat - Jahandyq úzdik kólikter Japonııa astanasynda - Tokıoda jyl saıyn uıymdastyrylatyn dástúrli avtosalon óz jumysyn bastady, - dep habarlady www.24.kz.
Áıgili kórmede dúnıe júziniń úzdik temir tulparlary jurt nazaryna usynylady. Olardyń arasynda ózdiginen basqarylatyn kólikter, sýtegimen júretin avtobýstar jáne úzdik sýperkarlar bar. Bolashaqta avtoónerkásipti birshama ózgeris kútip tur. Ózdiginen sheshim qabyldaıtyn júrgizýshisiz mashına endi tek qııal ǵana emes. Jaıaý júrginshilerdiń qaýipsizdigi úshin ınjenerler tipti kólikterdiń syrtyn jumsaq qylyp, al janarmaıdyń ornyna sýtegin paıdalanbaq. Shamamen 10-15 jyldan keıin dál osyndaı temir tulparlardy tizgindeıtin bolamyz.
«Bul modeldiń avtokólikten de artyq paıdasy bar desem bolady. Biz mashına júrý úshin oǵan energııa kerek degen qaǵıdany buzdyq. Máselen,jańa elektromobıl - energııa kózi. Mashınamen júrgen kezde jınalǵan energııany turmysta paıdalanýǵa múmkindik bar. Bir sózben aıtqanda, generator kólik», - deıdi joba menedjeri Takeo Morıaı.
Japonııalyq avtoóndiris kórmede óziniń jańa úlgidegi birneshe kóligin usyndy. Olardyń arasynda gıbrıdtyq krossoverdi erekshe ataýǵa bolady. Tehnıkanyń sońǵy úlgisimen jabdyqtalǵan zamanaýı mashına bir jyldan keıin júrgizýshilerge jol tartpaq.
«Qazir janarmaıdy 20%-ǵa deıin únemdeýge múmkindik bar. Ázirge kólik tek Japonııa men Amerıka naryǵyna shyǵady. Aldaǵy jyldyń jeltoqsanynda Ortalyq Azııa elderine de jetedi dep josparlap otyrmyz», - kompanııanyń bas ınjeneri:Koýdjı Toıoshıma.
Eýropalyq avtokólikter de basty nazarda. Mercedes-Benz usynǵan ózdiginen basqarylatyn mınıvenge qyzyǵýshylyq kóp. Volkswagen kontserni de ózgelerden qalys qalar emes. Kórmege qatysýǵa kelgen 160 kompanııa úzdik degen úlgilerin kópshilikke pash etýde. Sondaı-aq jańa 76 kóliktiń tusaýy kesildi.
