10-11 synyp oqýshylary kásipkerlik boıynsha bilim alady
NUR-SULTAN. QazAqparat - QR Bilim jáne ǵylym vıtse-mınıstri Fatıma Jaqypova joǵary oqý oryndary men mektepte kásipkerlikke oqytýdy damytý týraly aıtyp berdi, dep habarlaıdy QazAqparat tilshisi.
«Bilim berý uıymdary, ıaǵnı joǵary oqý oryndary qazirgi ózgeristerge tıisti deńgeıde is-qımyl jasap, qoǵamnyń áleýmettik múddelerin jáne naryq talaptaryn bir mezgilde qanaǵattandyrýǵa qaýqarly bolýy kerek. Búginde kásipkerlik bilimmen oqý protsesiniń barlyq deńgeıi qamtylǵan», - dedi F. Jaqypova elordadaǵy «Innovatsııalyq ekonomıka úshin kásipkerlik bilim» atty ІІІ halyqaralyq forýmynda.
Osy oraıda ol orta bilim deńgeıinde «Atameken» UKP-men birlese kásipkerlik negizderi boıynsha oqý baǵdarlamasy ázirlengenin eske saldy. 2018 jyldyń qyrkúıeginen bastap osy pán 17 qanatqaqty mekteptegi onynshy synypta aprobatsııadan ótýde. Kelesi kezeńde jalpy bilim berý mektepterinde 10 synyp tolyqtaı qamtylady, al 2020-2021 jyldary kásipkerlik negizderi 11 synypta oqytylady.
Onyń aıtýynsha, kolledjderde kásipkerlik bilim dýaldy oqytý aıasynda sátti iske asyrylýda.
«Joǵary bilim salasynda da tıisti jumystar atqarylýda, ıaǵnı 60-tan astam JOO-da «Kásipkerlik negizderi» páni engizilgen. Sýdentterdiń kásipkerlik daǵdylaryn arttyrý men bolashaq bıznesmenderdi daıarlaý maqsatynda bilim berý baǵdarlamasy ázirlenýde. Oqytýshylar túrli trenıngterden ótip, semınarlarǵa qatysýda», - dedi Jaqypova.
Osy oraıda ol stýdentter startap-jobalardy ashyp, ózderiniń bıznes ıdeıalaryn iske asyryp jatqanyn jetkizdi. 50-den astam JOO-da 350 startap júzege asyrylýda. Olardyń arasynda 241 startap ınvestıtsııa tartty.
Budan buryn habarlanǵandaı, elordada «Innovatsııalyq ekonomıka úshin kásipkerlik bilim» atty ІІІ halyqaralyq forým óz jumysyn bastady.
Forýmnyń maqsaty - kásipkerlik bilim berý salasynda oqytý men tájirıbe almasý úshin ashyq saraptamalyq pikirtalasqa aýdıtorııany tartý. Onda mamandar osy sektordaǵy bilim berý baǵdarlamalarynyń úzdik tájirıbeleri men trendteri týraly áńgimeleıdi.
