10-11 sáýirde qar kóshkini túsedi, taýǵa barmańyzdar: TJM eskertý jasady

ASTANA. KAZINFORM – «Qazgıdromet» RMK derekteri boıynsha 10-11 sáýirde respýblıkanyń taýly aýdandarynda (2000-nan astam metr bıiktikte)  jylymyq áserinen qar jamylǵysynyń bosap, turaqsyz bolýyna baılanysty qar kóshkininiń túsý qaýpi saqtalady.

Tótenshe jaǵdaılar mınıstrligi osy kezeńde taýǵa jáne qar kóshkinin týdyrmaý úshin taýdyń qarly betkeılerine barýdan bas tartýǵa keńes berdi.

Kóktem – qar kóshkini asa qaýipti kezeń. Naýryzdan sáýirge deıingi aralyqta, ásirese Qazaqstannyń ońtústik jáne ońtústik-shyǵys óńirlerinde qar kóshkini jıi túsedi. Temperatýranyń ózgerýi, qalyń qar men boran qaýipti tek arttyrady.

Shyǵys Qazaqstan, Almaty, Túrkistan jáne Jetisý oblystarynyń aýmaqtaryndaǵy Qazaqstan Altaı, Іle, Jetisý, Talas Alataýy jotalarynyń betkeıleri – asa kóshkin qaýipti aýdandar.

Qar kóshkini qaýpi bar kezeńniń basynan bastap jalpy kólemi 87 262 tekshe metr bolatyn 39 kóshkinniń ózdiginen túsýi tirkeldi. Halyqtyń, týrıster men demalýshylardyń qaýipsizdigin qamtamasyz etý maqsatynda qar kóshkininiń 103 profılaktıkalyq túsýi júrgizildi, túsken qardyń jalpy kólemi 180 157 tekshe metr boldy. Bul taý shańǵyshylary, týrıster, alpınıster úshin asa qaýipti.

- Qar kóshkininiń astynda qalmas úshin taýdaǵy qaýipsizdik erejelerin bilý jáne saqtaý mańyzdy – bul ómirdi saqtap qalýy múmkin. Qaıǵyly jaǵdaıdy boldyrmaý úshin aýa raıy boljamyn muqııat qadaǵalańyz. Daıyn emes betkeıler men marshrýttardan aýlaq bolyńyz, tek tańbalanǵan soqpaqtarmen júrińiz.Daýyldy eskertý jarııalaǵan kezde taýǵa shyqpańyz. Osy qarapaıym erejelerdi saqtaý sizdiń ómirińizdi saqtap qalýy múmkin. Ózińizdi jáne jaqyndaryńyzdy qorǵańyz, - delingen habarlamada.

Aıta keteıik, Almaty taýlarynda qar kóshkini túsirildi.