10 000 brıtandyq jazýshy mátinsiz kitap shyǵardy
ASTANA. KAZINFORM — Ulybrıtanııada 10 000-nan astam jazýshy jasandy ıntellekt kompanııalarynyń óz shyǵarmalaryn ruqsatsyz paıdalanýyna narazylyq retinde mátinsiz kitap shyǵardy, dep habarlaıdy Forbes.ru portaly The Guardian basylymyna silteme jasap.
Kitap «Don’t steal this book» («Bul kitapty urlama») dep atalady. Onyń mazmuny tek avtorlardyń tizimi ǵana. Kitaptyń shyǵarylýyna úles qosqandardyń arasynda aǵylshyn telejúrgizýshisi jáne jazýshysy Rıchard Osman, «Boleın áýletinen taǵy bireý» romanynyń avtory Fılıpp Gregorı, sondaı-aq Nobel syılyǵynyń laýreaty, brıtandyq jazýshy Kadzýo Isıgýro bar.
Kitaptyń kóshirmeleri 10 naýryzda ashylatyn London kitap jármeńkesine kelýshilerge taratylady. Jobanyń uıymdastyrýshysy, kompozıtor jáne avtorlyq quqyq belsendisi Ed Nıýton-Rekstiń aıtýynsha, jasandy ıntellekt ındýstrııasy «ruqsatsyz jáne tólemsiz urlanǵan shyǵarmalarǵa negizdelgen».
– Bul qurbansyz qylmys emes – generatıvti jasandy ıntellekt adamdardyń jumysynan úırenip, olarmen básekelesip, olardyń kúnkórisin tartyp alady. Úkimet Ulybrıtanııanyń jazýshylaryn qorǵap, jasandy ıntellekt kompanııalarynyń shyǵarmashylyq jumystaryn urlaýyn zańdastyrýdy toqtatýy kerek, - dedi ol.
Bir jyl buryn, 2025 jyldyń aqpan aıynda myńnan astam mýzykant, sonyń ishinde Blur tobynyń ánshileri Deımon Albarn, Ennı Lennoks jáne Keıt Býsh Ulybrıtanııa úkimetiniń jasandy ıntellekt ázirleýshilerine avtorlyq quqyqpen qorǵalǵan týyndylardy paıdalanýǵa ruqsat berý josparyna narazylyq retinde únsiz birlesken albom shyǵarǵan edi. Albom «Biz qalaǵan nárse osy ma?» dep atalady, onda barlyǵy 47 mınýtqa sozylatyn 12 trek bar. Olar kontsert zaldary men stýdııalardaǵy tolyq tynyshtyqtyń nemese qandaı da bir shýdyń jazbalary.
Ulybrıtanııa úkimeti jasandy ıntellekt kompanııalaryna ınternette qoljetimdi mýzykany qosa alǵanda, avtorlyq quqyqsyz óner týyndylaryn paıdalanýǵa múmkindik beretin zańǵa túzetýler engizýdi uzaq ýaqyt boıy qarastyryp keledi.
Eske sala keteıik, Qytaı gýmanoıd robottary men jasandy ıntellektini standarttaýdy bekitti.