1 jylǵa keshikken UEFA EURO 2020: Otandyq telearnalar tikeleı efırde kórsetedi
NUR-SULTAN. QazAqparat - Qazaqstan teleradıokorporatsııasy fýtboldan UEFA EURO 2020 matchtaryn kórsetý quqyǵyn ıelendi, dep habarlaıdy QazAqparat tilshisi.
Esterińizge salsaq, fýtboldan Eýropa birinshiligi ótken jyly ótýi tıis edi. Alaıda koronavırýs pandemııasyna baılanysty bir jylǵa shegerilgen bolatyn. Endi 16-shy Eýropa birinshiligi 2021 jyldyń 11 maýsymy men 11 shilde aralyǵynda ótetindigi belgili bolyp otyr. Qazaqstandyq jankúıerler chempıonattyń barlyq oıyndaryn Qazaqstan men Qazsport arnalarynan tikeleı efırde tamashalaı alady.
«Teleradıokorporatsııa fýtbol kommentatorlary úshin sheberlik sabaqtaryn ótkizip, 1 aı boıy tikeleı efırde úzdiksiz habar taratýǵa daıyndyq ústinde. Teleefırlerden bólek, Korporatsııa saıttarynda onlaın kórsetilim júrgiziledi. Ádette mundaı kórsetilimder kezinde efırdi onlaın kórýshiler sany kúrt artady, osyny eskerip, saıttardyń tehnıkalyq múmkindikteri de kúsheıtilgen jumys tártibine kóshirilýde», - dedi teleradıokorporatsııasynyń baspasóz qyzmetinen.
60 jyldyq tarıhy bar týrnır alǵash ret 11 qalada - Amsterdam (Nıderland), Baký (Ázerbaıjan), Býharest (Rýmynııa), Býdapesht (Majarstan), Kopengagen (Danııa), Glazgo (Shotlandııa), London (Anglııa), Mıýnhen (Germanııa), Rım (Italııa), Sankt-Peterbýrg (Reseı), Sevılıada (Ispanııa) birdeı ótpek.
UEFA EURO-2020 týrnıriniń fınaldyq kezeńine shyqqan 24 qurama 6 topqa bólingen:
A toby: Túrkııa, Italııa, Ýels, Shveıtsarııa
B toby: Danııa, Fınlıandııa, Belgııa, Reseı
C toby: Nıderland, Ýkraına, Avstrııa, Soltústik Makedonııa
D toby: Anglııa, Horvatııa, Shotlandııa, Chehııa
E toby: Ispanııa, Shvetsııa, Polsha, Slovakııa
F toby: Majarstan, Portýgalııa, Frantsııa, Germanııa
1/8 fınalǵa ár toptan eń myqty eki qurama men úshinshi oryn ıelengen tórt úzdik komanda shyǵady.
Týrnırdiń ashylý matchy 11 maýsymda Rımdegi «Olımpııskıı» stadıonynda, al fınaldyq kezdesý 11 shildede Londondaǵy «Ýemblı» stadıonynda ótedi. Chempıonat qarsańynda Qazaqstan jáne Qazspor» telearnalarynan tikeleı efırde saraptamalyq baǵdarlama jaryqqa shyǵady. Oǵan sportshylar men sarapshylar, fýtbol jankúıerleri qatysa alady.
