1 jeltoqsannan bastap Kókshetaýda jylý tarıfi tómendeıdi
«Kókshetaý jylý» kommýnaldyq kásipornynyń ekonomısti Artem Cherepanovtyń aıtýynsha, ótemaqy tarıf 1 jylǵa engiziledi.
«1 sharshy metr úshin tarıf burynǵy 130 teńgeniń ornyna 82 teńgeni quraıdy», deıdi ol.
Óńirlik kommýnıkatsııalar qyzmetiniń málimeti boıynsha, Aqmola oblysy boıynsha tabıǵı monopolııalardy retteý, básekelestikti qorǵaý jáne tutynýshylar quqyǵyn qorǵaý departamentiniń 2018 jyldyń 31 qazandaǵy buıryǵy boıynsha Kókshetaý qalasy ákimdigi janyndaǵy «Kókshetaý jylý» kommýnalyq kásipornynda qosymsha qun salyǵyn eseptegende 36 paıyzǵa tómendetilgen ýaqytsha mólsherli ótemaqy tarıfi bekitildi.
«Óndiris boıynsha jylý energııasyn ótkizý, berý, úılestirý jáne jabdyqtaýda dıfferentsııaly tarıf esepteý aspaptary bar jeke tulǵalarǵa 2101,68 den 1329,09 teńgege tómendeıdi. Esepteý aspaptary joq jeke tulǵalarǵa 4520,24 ten 2858,57 teńgege deıin kemıdi. Al, esepteýish aspaptay bar zańdy tulǵalarǵa 5244,83 ten 3316,8 teńgege deıin, esepteý aspaptary joq zańdy tulǵalarǵa 9395,12 den 5941,4 teńgege tómendeıdi.
Sonymen qatar, jylý energııasyn esepteý aspaby joq, jeke sý esepteý aspaby bar tutynýshylar úshin sý jylytý aqysynyń kólemi 226,01 den 142,93 teńgege deıin, jylý energııasyn esepteý aspaby joq, jeke sý esepteý aspaby joq tutynýshylar úshin sý jylytý aqysynyń kólemi 711,95 ten 450,22 teńgege deıin tómendep otyr», - dep túsindirdi vedomstvodan.
Al, Aqmola oblysynyń prokýratýrasy «Kókshetaý jylý» kommýnaldyq kásipornyna prokýrorlyq tekseris júrgizilgenin atap ótti.
«Kásiporynnyń 2015-2017 jyldar aralyǵynda negizsiz 1,3 mıllıard teńge kóleminde tabys tapqany anyqtaldy. Prokýratýranyń talaby boıynsha jylý úshin ýaqytsha ótemaqy tarıfi engiziledi. Nátıjesinde Kókshetaý qalasynyń turǵyndary jeltoqsannyń 1-nen bastap, 1 sharshy metr úshin 73,4 teńge tóleıtin bolady. Bl qoldanystan tarıften eki esege deıin az», deıdi oblys prokýratýrasynan.
Degenmen, kókshetaýlyqtar páterleriniń salqyn bolýyn aıtyp, shaǵymdanýda.
«Biz úıge deıingi jelige qyzmet kórsetemiz. Al, úıdiń ishinde ne bolyp otyr, onda sharýamyz joq. Onymen PIK aınalyssyn. Biz qazir shaǵymdaǵan adamdardyń páterlerin tekserýdemiz. Termometrde 20-21 gradýsty kórsetip tur. Bul qalypty kórsetkish. Jylýdyń mol bolýy úshin jańa tehnologııany qoldaný qajet. Óıtkeni, kóptegen úıler eski. Jańa úılerdegi páterlerde jyly. Olarda jańa jabdyqtar ornatylǵan. Eger turǵyn úıler qysqa durys daıyndalsa, barlyq batareıalar tazalansa, mundaı másele týyndamas edi», dep túsindirdi «Kókshetaý jylý» kommýnaldyq kásipornynyń bas dırektory Sergeı Jýkov.
Eske salaı keteıik, Astanada tarıf qalyptastyrý suraqtary boıynsha ótken qaýipsizdik otyrysynda Memleket basshysy Bas prokýratýraǵa monopolısterdiń qyzmetin tekserý týraly tapsyrma bergen bolatyn.