1 jeltoqsannan bastap Qazaqstanda kólik lızıngige beriledi
ASTANA. KAZINFORM – QR Parlamenti Májilisiniń depýtaty Oljas Quspekov Jibek Joly telearnasynyń «Búgin LIVE» baǵdarlamasynda avtolızıngtiń tıimdiligi men erekshelikterin egjeı-tegjeıli túsindirdi.
Depýtattyń aıtýynsha, qazir elimizde lızıng tek zańdy tulǵalarǵa, ıaǵnı avtoparki bar kompanııalarǵa ǵana beriledi. Al álemdik tájirıbe kórsetkendeı, mysaly, Qurama Shtattarda avtokólikterdiń tórtten biri lızıng arqyly rásimdeledi.
– Lızıng – avtomobıldi uzaq merzimge jalǵa alyp, merzimi aıaqtalǵan soń ony tolyq satyp alýǵa múmkindik beretin qural. Avtonesıeden basty aıyrmashylyǵy – satyp alýshy kólikti paıdalaný kezeńindegi amortızatsııasyna tóleıdi, sondyqtan jarnasy men aı saıynǵy tólemi arzanyraq shyǵady. AQSh-ta adamdar eki-úsh jyl lızıngke alǵan kóligin paıdalanyp, keıin jańa kólikke aýystyrady. Eń basty qaýip – lızıngke kólik bergen kásiporyn bankrotqa ushyrasa, adam kólikten aıyrylyp qalýy múmkin, – dedi Oljas Quspekov.
Depýtat atap ótkendeı, Respublica partııasy avtolızıng júıesin azamattarǵa engizý týraly usynysty alǵash ret 2023 jyly kótergen.
– Kóptegen qazaqstandyq úshin kólik satyp alý – úlken qarjylyq salmaq. Barlyǵy birdeı qymbat nesıe ala almaıdy nemese alǵashqy jarnany jınaýǵa jyldar qajet bolady. Biz bul máseleni eki jyl buryn kóterdik, endi ol is júzinde júzege asady degen úmit basym, – deıdi depýtat.
Quspekovtiń aıtýynsha, Qazaqstanda 2024 jyldyń esebi boıynsha 5 mln 574 myń avtokólik tirkelgen, onyń 50 paıyzdan astamy 20 jyldan asqan.
– Kólik tek baılar minetin dúnıe emes, ony qarapaıym azamattarǵa qoljetimdi etýimiz kerek. Bıyl osy baǵyttaǵy negizgi jumystar bastalady, – deıdi depýtat.
Aıta keteıik, 1 jeltoqsannan bastap Qazaqstanda jeke tulǵalarǵa arnalǵan jańa avtolızıng baǵdarlamasy iske qosylmaq.
Buǵan deıin Saýda mınıstrligi jańa jobany talqylaýǵa shyǵarǵan bolatyn.