«1 teńge = 1 baspana» usynysyn qazaqstandyqtar qoldaýda
ASTANA. QazAqparat - Nurdáýlet Nurádil esimdi áleýmettik jeli qoldanýshysy óziniń Feısbýktegi paraqshasynda qazaqstandyqtardy baspanamen qamtamasyz etý máselesi boıynsha usynys tastady. Onyń pikirinshe, ár adam 1 teńgeden sadaqa berse, birtindep eldegi turǵyn úı máselesin sheshýge bolady eken.
«Qazirgi tańda baspana máselesi barsha qazaqtyń basty ýaıymyna aınalyp úlgerdi. Ásirese jastardyń. Memlekettik baǵdarlamamen beriletin úılerdiń sany muqtaj jandardyń 10 paıyzyn qamtamassyz ete almaı keledi. «Endi qalaı baspanaly bolam?» dep, tapqany tamaǵynan artylmaıtyn aǵaıynǵa qalaı úı alyp berýge bolady? Eger biz birige alsaq, 1 teńgemizdi bir otbasy úshin qısaq bul máseleni de sheshýge bolady. Ol bárimiz biletin mynandaı esep, tek bedeldi tulǵalar men beldi aqparat kózderi qoldasa bolǵany. Resmı aqparat boıynsha, Qazaqstanda 17 mln. 671 myń adam turatyny málim. Biz sonyń 7 mln. esepke almadyq degenniń ózinde 10 mln. adam qalady. Menińshe, 1 teńgeni sadaqaǵa bere alatyn 10 mln. adam bar. Endeshe, bizde 10 mln. teńge jınalady. Bul degenińiz - Almaty men Astanadan 1 nemese 2 bólmeli, al qalǵan qalalardan 3-4 bólmeli úı alatyn aqsha. Osylaısha ár juma saıyn 1 teńgeden sadaqa berip otyrsaq, 1 jylda 52 otbasyn baqytqa bólep mol saýapqa qalar edik. Eger kún saıyn 1 teńgeden jınalsa 1 jylda 365 adam baspanaly bolady. Eshqandaı talan-tarajysyz, basqa baǵytqa emes, tek «1 teńge= 1 úı» dep qor ashyp, qoldap jiberer azamattar bolsa qazaqtyń baspana máselesi ózinen ózi-aq sheshiler edi!» - deıdi ol.
Nurdáýlettiń bul usynsyn jelide qoldaǵandar barshylyq. Qazirgi ýaqyttyń ózinde oǵan habarlasqan azamattar kóp kórinedi.
«Dostar, barshańyzǵa alǵysym sheksiz! Meni qoldap jekeme jazyp, telefon shalyp, «Ne isteı alamyz?» degen janashyr, meıirban júrekterińizden aınaldym. Shynymen, bul - bir qaraǵanda qarapaıym kóringenimen, kúrdeli protsess. Sondyqtan daıyndap, joba retinde júzege asyrýǵa nıetim bar. Eń bastysy, barsha qazaqtyń habardar bolǵany. Júrgen jerlerińizde aıta júrińizder! Bárimiz biriger bolsaq, almaıtyn qamalymyz bolmas! Bir ótinish, jan-jaqqa tartpaıyq! Biz úshin osy apta ishindegi halyqtyń pikiri óte mańyzdy», - dep jazǵan ol paraqshasyna.
