1 tamyzǵa deıin «Astana-Temirtaý» avtojolynyń 12 shaqyrymynda qozǵalys ashylady
Búgingi kúnge trassanyń 1308-1320 km ýchaskesinde joltabannyń joǵarǵy qabaty tóseldi. Merdiger uıymdar 1 tamyzǵa deıin 12 kılometrlik ýchaskeniń oń qanatyndaǵy, al jyl aıaǵyna deıin eki jaǵy boıynsha da qozǵalysty iske qosýdy josparlaýda.
Sonymen birge qazirgi ýaqytta 1275-1308 km aralyǵyndaǵy ýchaskede jalpy kólemi 211,8 kýb/m topyraq aýdarystyrý jumystary, sol sııaqty 600 adamǵa arnalǵan modýldi turǵyn úı qalashyǵyn salý jumystary júrgizilýde. Ol qalashyqta topyraqty, asfalt-betondy, betondy qospalar men jol-qurylys materıaldaryn synaqtan ótkizýge arnalǵan akkredıttelgen laboratorııa ornalasqan.
Osyndaǵy atqarylyp jatqan jumys barysymen ótken demalys kúnderi kólik jáne kommýnıkatsııa mınıstri Jeńis Qasymbek tanysyp qaıtty. Sapar barysynda KKM basshysy Aqmola oblysyndaǵy 3 ýchaske jáne Qaraǵandy oblysyndaǵy 2 ýchaskeni aralady. Mınıstr merdigerlik uıymdar basshylaryna jumysty shıratý jáne barlyq ýchaske boıyndaǵy qozǵalys qaýipsizdigin qamtamasyz etýge baılanysty birqatar tapsyrmalar berdi.
«Astana-Temirtaý» ýchaskesinde barlyq uzyndyǵy 109 km 5 ýchaskede jumystar júrgizilýde. Aǵymdaǵy jylǵy maýsymda jalpy uzyndyǵy 62 km bolatyn qalǵan ýchaskelerdiń merdigerleri aıqyndalady. Sóıtip bıyl búkil trassa boıynda qurylys jumystary atqarylatyn bolady.
Rekonstrýktsııa jumystary aıaqtalǵan soń 2016 jyly «Astana-Temirtaý» avtojoly tórt jolaqqa deıin keńeıtilip І tehnıkalyq sanatqa jatqyzylatyn bolady.
