1 tamyzdan bastap Almatyda Qala qurylysy keńesi jumysyn bastaıdy
NUR-SULTAN. QazAqparat – Almaty qalasynyń sáýlet-qurylys salasyndaǵy olqylyqtaryn ákimdik janynan qurylǵan keńes arqyly retteý kózdelip otyr, dep habarlaıdy QazAqparat tilshisi.
Bul týraly Qazaqstan sáýletshiler odaǵynyń prezıdenti Serik Sultanǵalı ortalyq kommýnıkatsııalar qyzmetinde ótken brıfıngide aıtty.
Táýelsizdiktiń 30 jylynda elde arhıtektorlardyń mártebesi syn kótermeıtindeı deńgeıge túsip ketkenin másele etip kótergen odaq basshysy salada qordalanǵan máselelerdiń bárin tizip, Prezıdentke júgingenderin eske saldy.
«Prezıdent Qasym-Jomart Kemelulyna jazǵan hatymda men sáýlet salasyndaǵy máselelerdi kótere otyryp, Almaty qalasyn mysalǵa keltirdim. Ońtústik astanamyz – kóp adam úshin súıikti qala. Qazir «núkteli qurylys», «nyǵyzdaýshy qurylys» dep atap júrgen jobalar Almatynyń eń basty problemasy – seısmıkany eskermeı iske asyrylyp keldi. Kópqabatty úılerdiń, shekten tys bıik úılerdiń kóptep salynýy arhıtektorlardy ǵana emes, osy bassyzdyqtardyń arasynda tirshilik keship jatqan qalanyń qarapaıym turǵyndaryn da alańdatyp otyr», - dedi Serik Sultanǵalı.
Sondaı-aq, ol qurylystyń saýatty josparlanbaýy saldarynan Almatynyń ınfraqurylymyna da zııan kelgenin atap ótti.
«Nyǵyzdaýshy qurylys» jeleýimen skverler, turaqtar súrilip ketti. Árıne, dál qazir ol is tártipke kelińkireı bastady. Nege bulaı bolyp keldi? Óıtkeni, eń basty qural – ákimdik janynan jumys isteıtin qala qurylysynyń keńesi bolǵan joq. Almatynyń ákimi sondaı keńesti qurdy. 1 tamyzdan bastap sol keńes jumys isteı bastaıdy», - dedi odaq tóraǵasy.
Buǵan deıin Nur-Sultan qalasynyń sáýlettik qurylysyn josparlaý erejesi bekitilgen bolatyn.
