1 tamyzdan bastap elimizde ne ózgeredi
ASTANA. KAZINFORM – Tamyz aıynda qazaqstandyqtardy birqatar mańyzdy ózgeris kútip tur.
Ulttyq aýyl sharýashylyǵy sanaǵynyń birinshi kezeńi bastalady
1–31 tamyz aralyǵynda Qazaqstanda Ulttyq aýyl sharýashylyǵy sanaǵynyń birinshi kezeńi ótedi.
Osy kezeńde barlyq qatysýshy sanaq.gov.kz saıtynda onlaın formatta saýalnamadan óte alady. Onda aýyl sharýashylyǵy óndirýshileri men sharýa ıeleri eki túrli saýalnamaǵa jaýap beredi.
Berilgen aqparat qatań qupııa jáne «Memlekettik statıstıka týraly» zańmen qorǵalǵan, salyq nemese ózge de organdarǵa berilmeıdi.
Sanaq aıasynda shamamen 300 myń aýyl sharýashylyǵy uıymy men 2 mln úı sharýashylyǵy qamtylady dep otyr.
AQSh Qazaqstannan jetkiziletin ımportqa 25% baj salyǵyn engizedi
1 tamyzdan bastap AQSh Qazaqstannan jetkiziletin barlyq ımport taýarǵa 25% kóleminde baj salyǵyn engizetin boldy. Bul týraly AQSh prezıdenti Donald Tramp shildede Truth Social jelisinde jarııalanǵan hatynda málimdedi.
Hatta Tramp Qazaqstanmen saýda qatynastyń mańyzdylyǵyn atap ótip, yntymaqtastyqqa daıyn ekenin aıtty. Sonymen qatar, eger qazaqstandyq kompanııalar AQSh aýmaǵynda óndiris ashsa, olarǵa baj salyǵy salynbaıtynyn jetkizdi.
Aıta ketsek, Qasym-Jomart Toqaev Donald Tramptyń Qazaqstannan ımporttalatyn taýarlarǵa baj salyǵyn salý týraly hatyna jaýap joldady.
Elektr energııasy tarıfi ózgeredi
Energetıka mınıstriniń mindetin atqarýshy 29 shildede «Elektr energııasyna shekti tarıfti bekitý týraly» buıryqqa qol qoıdy. Qujatqa sáıkes, elektr energııasyn óndiretin kompanııalardyń tarıfi kelesideı ózgeredi:
- T.I. Batýrov atyndaǵy Jambyl GRES — tarıf 22,58 teńgeden 23,25 teńgege deıin kóteriledi (1 kVt/saǵ úshin).
- Aqtóbe JEO — 17,54 teńgeden 18,19 teńgege deıin.
- «Jaıykteploenergo» AQ — 13,25 teńgeden 13,95 teńgege deıin.
- «MAEK-Qazatomónerkásip» — 22,16 teńgeden 23,26 teńgege deıin.
- «Krıstall Menedjment» AQ — 15,27 teńgeden 16,09 teńgege deıin.
- «Aqtóbe rels-arqalyq zaýyty» JShS — 21,11 teńgeden 23,58 teńgege deıin.
- «Z-Energoortalyq» — 16,77 teńgeden 18,46 teńgege deıin.
- «Qyzylordajylýelektroortalyǵy» — 12,10 teńgeden 13,13 teńgege deıin.
- «Batys Paýer» JShS — 15,89 teńgeden 17,63 teńgege deıin.
- «Karabatan Utility Solutions» JShS — 10,67 teńgeden 13,06 teńgege deıin.
- «OzenMunaiProm» JShS — 26,92 teńgeden 28,68 teńgege deıin.
- TNK «Qazhrom» AQ — 10,67 teńgeden 11,65 teńgege deıin.
- «SSGPO» AQ — 18,82 teńgeden 18,94 teńgege deıin.
Sondaı-aq elektr energııasyn óndirýshi uıymdardyń 63-tobyna arnalǵan tarıf 1 kVt/saǵ úshin 44,02 teńge bolyp belgilendi.
Kezekti UBT ótedi
10–14 tamyz aralyǵynda negizgi UBT-da shekti ball jınaı almaǵan talapkerler testi qaıta tapsyryp, aqyly negizde JOO-ǵa túsýge múmkindik alady. Testileý orny, kúni men ýaqytyn tańdaý talapkerdiń erkinde.
Tamyzdaǵy ulttyq biryńǵaı testileýge kelesi sanattaǵy talapkerler qatysa alady:
- Mektep pen kolledj túlekteri (bıylǵy jáne aldyńǵy jylǵy túlekter)
- Shetelde oqyǵan túlekter
- Qandastar
- Shyǵarmashylyq mamandyqtan basqa baǵytqa aýysqysy keletin stýdentter
- Basqa mamandyqtan pedagogıkalyq baǵytqa aýysqysy keletin stýdentter
- JOO-ǵa shartty túrde qabyldanǵan stýdentter.
Almaty – Mınsk baǵytynda áýe reısi ashylady
10 tamyzdan bastap «Almaty – Mınsk – Almaty» baǵytynda tikeleı áýe reısi iske qosylady. Ushaqtar ár sársenbi men jeksenbi kúnderi qatynaıdy. Áýe marshrýty iskerlik jáne týrıstik saparlar úshin jańa múmkindik usynǵaly otyr.
Djennıfer Lopes Astana men Almatyda óner kórsetedi
1 tamyzda «Astana Arena» stadıonynda áıgili ánshi Djennıfer Lopes jeke kontsert beredi. Sol kúni qalanyń keıbir kóshesinde qozǵalys ýaqytsha shekteledi.
Ekinshi kontsert 10 tamyzda Almatydaǵy Ortalyq stadıonda ótedi.
Aldyn ala derek boıynsha, eki kontserttiń nátıjesinde memleket bıýdjetine 400 mln teńgege deıin salyq túsedi.
Qazaqtelekom tarıf shartyn jańartady
«Qazaqtelekom» AQ mobıldi baılanys tarıf sharttaryn qaıta qaraıtynynyn habarlady. Atalǵan ózgerister «Mobaıl Telekom-Servıs» arqyly usynylatyn «Praktıchnyı», «Bazovyı», «Keremet 2» tarıfterine qatysty.
ChatGPT aqysy qymbattaıdy
1 tamyzdan bastap OpenAI qazaqstandyq paıdalanýshylar úshin qosylǵan qun salyǵy mólsherin jazylym qunyna engizedi.
Sáıkesinshe, ChatGPT Plus tarıfi $20-dan $22,40-qa deıin qymbattaıdy (12% QQS esebimen).
OpenAI naqtylaǵandaı, Qazaqstanda qosylǵan qun salyǵyn (QQS) tóleýshi retinde tirkelgen zańdy tulǵalar men jeke kásipkerlerdiń atalǵan salyqty tólemeý múmkindigi bar. Ol úshin 2025 jylǵy 1 tamyzǵa deıin akkaýnttyń salyq derekteri bóliminde bıznes sáıkestendirilgen nómirin kórsetý qajet. Áıtpese, salyqty jeke tulǵa retinde tóleýge mindetteledi.
30 tamyz – Konstıtýtsııa kúni
Bıyl ata zańǵa 30 jyl. Memlekettik mereke senbige túsip tur, sondyqtan demalys 1 qyrkúıek, ıaǵnı dúısenbige aýystyryldy. Osylaısha, aptasyna 5 kún jumys isteıtin azamattar 30, 31 tamyz jáne 1 qyrkúıek kúni úsh kún qatarynan demalady.