1-synypqa qujattardy qabyldaý uzartylýy múmkin be

ASTANA. QazAqparat – Oqý-aǵartý mınıstri Ǵanı Beısembaev 1-synypqa qujattardy qabyldaý nelikten 1 tamyzǵa deıin júretinin túsindirdi, dep habarlaıdy QazAqparat tilshisi.

«Qujattar qabyldaýdy biz erterek, kóktemnen bastaımyz. Oqýshylardyń sanyn anyqtap, oqýlyq daıyndaýdy aldyn ala josparlaý kerek. Qujat qabyldaýdy 1 qyrkúıekke deıin uzartýǵa da bolar edi. Onda 1-synyp oqýshylaryna qansha kitap kerektigi belgisiz bolady. Oqýlyqtardy erterek qajetti kólemde satyp alý qajet. Ýaqyttyń tyǵyzdyǵynan 1 tamyzǵa deıin ǵana qujat qabyldaý júredi», - dedi Ǵanı Beısembaev Úkimet otyrysynan keıin tilshilerdiń suraǵyna jaýap bere turyp.

Aıta ketsek, birinshi synypqa qujattardy qabyldaý 1 tamyzda aıaqtalatyny týraly habarlaǵan edik.

Mınıstrliktiń málimetinshe, bıyl birinshi synypqa qabyldaý boıynsha 400 myńnan astam ótinish tústi.

Bıyl mektepke baratyn balalardyń 70 paıyzy qazaq tilinde bilim alýdy tańdaǵan. Qalǵandary orys, uıǵyr jáne tájik tilderinde oqýǵa berilip otyr.