«1 stýdııa» tok-shoýyna mınıstrlerdi shaqyrýdy josparlap otyrmyz - Berik Ýálı
ASTANA. QazAqparat - «1 stýdııa» qoǵamdyq-saıası tok-shoýy efırine elimizdegi vedomstvolardyń basshylary shaqyrylady. Bul týraly atalǵan tok-shoýdyń júrgizýshisi, tanymal telejýrnalıst Berik Ýálı málim etti, dep habarlaıdy QazAqparat.
«Aldaǵy ýaqytta qoǵamdyq-saıası tok-shoýǵa mınıstrlerdi shaqyrýdy josparlap otyrmyz. Osy joly Investıtsııalar jáne damý mınıstri Jeńis Qasymbek qatysty. Atap aıtqanda, bul qyzý pikirsaıysty jeksenbi kúni saǵat 20:00-de tamashalaı alasyzdar. «Nurly jol» baǵdarlamasynyń aıasynda júzege asyrylyp jatqan jumystar týraly esep berip, suraqtarǵa jaýap berdi»,-dep atap ótti Berik Ýálı.
Aıta keteıik, tok-shoýǵa spıkerler retindi sonymen qatar Májilis depýtaty Nurtaı Sabılıanov, eknomıst-sarapshy Naılıa Álmuhamedova, ekonomıkalyq sholýshy Erbolat Muhamedjan qatysty.
«Esterińizde bolsa, Memleket basshysy Aqparat jáne kommýnıkatsııalar mınıstri Dáýren Abaevty qabyldaǵan kezde el óńirindegi ınfraqurylymdyq jobalardyń iske asyrylýyn kóbirek kórsetý kerektigin aıtqan bolatyn. Sondyqtan Jeńis Mahmudulyn arnaıy shaqyrdyq, óz kezeginde mınıstr myrza birden kelisti»,-dedi telejýrnalıst.
B.Ýálıdiń «1 stýdııa» qoǵamdyq-saıası tok-shoýy bıylǵy sáýirden bastap efırge shyǵýda. Habardyń maqsaty - elimizdegi eń ózekti degen saıası taqyryptardy qamtý.
